“Қўқон” эркин иқтисодий зонасида ташкил этилган “FER-INTERSTAR PLUS” унитар корхонасида ишлаб чиқарилаётган маҳсулотлар харидоргирлиги билан ажралиб туради. Бу ерда бино, уй ва бошқа иншоотларни пардозлашда қўл келадиган 13 турда фольга-профиллар тайёрланади.

Замонавий ишлаб чиқариш ускуналари билан жиҳозланган корхона ички бозор эҳтиёжини қондириш билан бирга маҳсулотларини экспортга ҳам чиқармоқда. Айни кунда металлаштирилган плёнка ишлаб чиқариш борасида амалий чора-тадбирлар кўрилмоқда. Асосан қурилиш, тиббиёт ва озиқ-овқат тармоқлари учун ниҳоятда зарур ушбу турдаги маҳсулот линиясига 500 минг АҚШ доллари миқдорида сармоя йўналтирилмоқда. Бу яна 20 та янги иш ўрнини яратиш имконини беради.

— Биз — экспортёр корхонамиз,- дейди унитар корхона раҳбари Ҳаётжон Абдуллаев. — Тўғри, ҳозир коронавирус пандемияси шароитида бутун дунё карантинда қолишни хавфсиз ва бу офатга қарши самарали усул деб ҳисобламоқда. Юртимизда ҳам бу борада қатъий ва натижадор ишлар қилинаётганини кўриб, билиб турибмиз. Шунга кўра, ишчи-хизматчиларимизни белгиланган тартибда муҳофазасини таъминлаган ҳолда ишлаб чиқаришда тўхташ қилганимиз йўқ.