Эквадор үкіметі ұйымдасқан қылмысқа қарсы күрес шараларын күшейтуге байланысты елде коменданттық сағат енгізбек.

Trend ақпарат агенттігінің хабарлауынша, елдің төрт өңірінде арнайы әскери операция аясында коменданттық сағат жарияланады. Бұл жөнінде Эквадор президенті Даниэль Нобоа елорда Кито қаласындағы Жоғары полиция мектебінде өткен іс-шарада мәлімдеді.

Оның айтуынша, осы айда аймақтағы одақтас мемлекеттермен бірлесіп бірқатар әскери операциялар жүргізіледі. Осыған байланысты 15 наурыз сағат 23:00-ден 30 наурыз сағат 00:00-ге дейін Гуаяс, Лос-Риос, Санто-Доминго-де-лос-Цакилас және Эль-Оро өңірлерінде коменданттық сағат күшінде болады.

Бұл шаралар елдегі қылмыспен күресу, қауіпсіздікті қамтамасыз ету және тұрғындардың тыныштығын сақтау мақсатында қабылданған.