Мамлакатда маҳсулотларни ташқи бозорларга олиб чиқишни кенгайтириш, ишлаб чиқаришда сифат талабларини ошириш ҳамда халқаро стандартларни жорий этиш бўйича аниқ йўналтирилган ишлар амалга оширилмоқда. Бу жараёнда корхоналар билан тўғридан-тўғри ишлаш ва уларнинг муаммоларини жойида ҳал этишга алоҳида эътибор қаратилмоқда.

Шу доирада 46 мингдан ортиқ корхона фаолияти таҳлил қилиниб, экспортга тўсқинлик қилаётган омиллар аниқланди ва уларни бартараф этиш бўйича амалий кўмак кўрсатилди. Корхоналарга халқаро бозорларга чиқишда қўлланиладиган талаблар, шунингдек, GSP+ тизими доирасидаги имкониятлар ва имтиёзлар бўйича тушунтириш ишлари ҳам олиб борилди.

Кўрилган чоралар натижасида экспорт билан шуғулланувчи корхоналар фаоллиги ошди. Хусусан, 2024 йилда 1 614 та корхона томонидан умумий қиймати 17 млрд АҚШ долларига тенг маҳсулот экспорт қилинди. Бу кўрсаткич ўтган йилга нисбатан сезиларли ўсишни қайд этди.

Айниқса, АҚШ ва Европа бозорларига чиқишда ижобий динамика кузатилди. Ушбу йўналишда экспортёр корхоналар сони ортиб, жами 78,2 млн АҚШ доллари қийматида маҳсулот етказиб берилди. Натижада мазкур бозорларга экспорт ҳажми 39 фоизга ошди.

Амалий ёрдамнинг самараси алоҳида корхоналар мисолида ҳам намоён бўлмоқда. Жумладан, “Basalt Engineering Corp” МЧЖ ҚКга халқаро аккредитация ва стандартларни жорий этиш бўйича кўрсатилган кўмак натижасида қурилиш маҳсулотлари АҚШ, Европа ҳамда МДҲ давлатларига экспорт қилинди.

Шунингдек, “BETLIS TEKSTIL” МЧЖ GSP+ имтиёзларидан фойдаланган ҳолда Европа Иттифоқи давлатларига тўқимачилик маҳсулотларини етказиб беришни йўлга қўйди.

“SIRDARYO MEGA LUKS” МЧЖ эса халқаро ISO стандартлари асосида сертификатлаштиришдан ўтиб, қўшни ва минтақавий бозорларга маҳсулот экспортини кенгайтиришга эришди.

Қайд этилишича, сифат инфратузилмасини мустаҳкамлаш, стандартлар билан ишлаш ва корхоналарни манзилли қўллаб-қувватлаш экспорт ҳажмларини оширишда муҳим омил бўлиб хизмат қилмоқда.