Бухоро вилояти божхона бошқармаси масъуллари Ромитан туманида фаолият юритаётган, табиий ипак тола ишлаб чиқариш ва экспорти билан шуғулланувчи корхона фаолияти билан танишди.

Ўрганишларда “Ромстар” қўшма корхонаси мутахассисларига божхона юк операцияларини сифатли ва тезкор амалга оширишда яқиндан ёрдам бериш мақсад қилинди.

Корхонада бугунги кунда 40 нафардан ортиқ ходим банд бўлиб, улар томонидан тайёрланган ипак толалари Вьетнам, Эрон ва Хитой бозорларига йўналтирилмоқда. Жорий йилнинг ўтган даври мобайнида мазкур давлатларга жами 1,5 миллион АҚШ долларлик маҳсулот экспорт қилинган. Шу билан бирга, ишлаб чиқаришни кенгайтириш мақсадида корхона жорий йилда 786 минг АҚШ доллари қийматидаги, умумий вазни 23 тоннага тенг бўлган ипак саноати учун зарур ускуналар ва техник деталларни импорт қилган.

Учрашув жараёнида ишлаб чиқарувчилар божхона тизимидаги янгиликлар ва тартиблардан ўз вақтида хабардор бўлишда сайёр мулоқотлар катта ёрдам беришини таъкидлади. Шунингдек, вилоят божхона бошқармаси масъуллари хорижий инвестиция асосида ташкил этилган корхоналар фаолиятини ҳам ўрганди.

Хусусан, Когон туманида жойлашган “XIANGYANG GROUP” хорижий корхонаси фаолияти билан яқиндан танишди. “Ғиждувон” эркин иқтисодий зона иштирокчиси ҳисобланган мазкур корхона Хитой Халқ Республикасидан тўғридан-тўғри киритилган 15 миллион АҚШ доллари миқдоридаги инвестиция маблағлари асосида ташкил этилган бўлиб, гофра қоғоз ва картон ишлаб чиқариш билан шуғулланади.

Божхона органи вакиллари билан бўлиб ўтган мулоқот жараёнида, қайта ишлаш божхона режимидан янада самарали фойдаланиш кўламини ошириш, тайёр маҳсулотларни экспортга йўналтириш ҳамда экспортда юзага келиши мумкин бўлган муаммоларни олдини олиш бўйича тушунтиришлар берилди.

Шунингдек, корхонага божхона омбори очиш тартиботлари ва божхона тўловларини кечиктириб ёки бўлиб-бўлиб тўлаш бўйича қўшимча тушунтиришлар берилди.

Зариф Комилов, ЎзА мухбири.