Бугун иқлим ўзгариши, экологик мувозанатнинг бузилиши, атмосферанинг ифлосланиши, чўлланиш каби муаммолар қишлоқ хўжалиги ҳамда озиқ-овқат хавфсизлигига таъсир кўрсатмоқда. Бутун дунёда ер-сув ресурслари, озиқ-овқат ресурслари тақчиллиги ошиб бораётгани мавжуд манбалардан оқилона фойдаланишда халқаро стандартларга ўтиш заруратини юзага келтирмоқда.

Шу боис Ўзбекистон Экологик партияси ўзининг Сайловолди дастурида бу борада бир қатор вазифаларни амалга ошириш зарурлигини илгари сурмоқда. Хусусан, партия қишлоқ хўжалиги ва озиқ-овқат маҳсулотлари етиштирувчиларни иқлим ўзгариши оқибатлари таъсиридан ҳимоя қилиш ҳамда форс-мажор ҳолатларда уларни давлат томонидан қўллаб-қувватлаш механизмларини қайта кўриб чиқиш лозим деб ҳисоблайди.  

Қишлоқ хўжалигида суғориладиган майдонлардан янада самарали фойдаланиш, фойдаланишдан чиққан ерларни қайта фойдаланишга киритиш чораларини кўриш, қишлоқ хўжалиги соҳасида суғурта бозорини такомиллаштириш ва суғурта хизматлари сифатини ошириш, қишлоқ хўжалиги ва чорвачилик соҳасида инновацияларни рағбатлантириш ташаббуслари илгари сурилмоқда.  

Шунингдек, партия озиқ-овқат маҳсулотларини ишлаб чиқаришни экологик талабларга тўлиқ мослаштириш, синтетик гўшт каби озиқ-овқат маҳсулотини ишлаб чиқариш ва сотишга қарши курашиш, озиқ-овқат маҳсулоти таркиби, қаерда ва қандай усулда ишлаб чиқарилган, жумладан генетик модификацияланган организмлар (ГМО) маҳсулотларининг миқдори бўйича маълумотларнинг маҳсулот ёрлиқларида аниқ кўрсатилишини таъминлаш, таркибида ГМО бўлмаган маҳсулотни оммалаштириш тарафдоридир.  

Бундан ташқари, Экопартия дастурида ноқулай иқлим шароитларига, қурғоқчиликка чидамли ўсимлик навлари экилиши ҳамда кўпайтирилиши учун давлат субсидияларини жорий этиш, қишлоқ хўжалиги экинларини етиштириш учун ерларни экишга тайёрлашда ресурс ва энергия тежамкор, экологияга безарар бўлган инновацион технологияларни кенг жорий этиш, четдан келтирилаётган, интродукция қилинаётган ўсимлик навлари ҳамда ҳайвон зотларини чуқур ўрганиш асосида жорий қилиш, инвазив бегона турларнинг кириб келишининг олдини олиш, назорат қилиш ёки йўқ қилиш чораларини кўриш таклиф этилмоқда.  

Партиянинг бу каби ҳаётий таклиф ва ташаббуслари сайловчиларга кенг тарғиб этилмоқда, уларнинг аҳамияти тушунтирилмоқда.  

Муҳтарама Комилова,

ЎзА