8 март — Халқаро хотин-қизлар куни муносабати билан Ўзбекистон Экологик партияси Марказий Кенгашида "Аёллар етакчилиги ва экологик сиёсат" мавзусида талаба-қизлар билан учрашув бўлиб ўтди.

Тадбирда Олий Мажлиси Қонунчилик палатасидаги Ўзбекистон Экологик партияси фракцияси аъзоси Моҳира Хўжаева тадбир иштирокчиларини Халқаро хотин-қизлар байрами билан қутлаб, мамлакатимизда хотин-қизларнинг жамият ҳаётидаги фаоллиги, уларнинг сиёсий ва ижтимоий жараёнлардаги иштироки тобора кенгайиб бораётганини таъкидлади.

Шунингдек, тадбирда Ўзбекистон Миллий академик драма теaтри актрисаси Нигина Анарбоева сўзга чиқиб, юртимизда ёш қизларнинг таълим олиш, лидерлик қобилиятларини ривожлантириш ва жамиятда муносиб ўрин эгаллашларида турли лойиҳалар муҳим аҳамият касб этаётганини алоҳида таъкидлади.  

Талаба-қизлар бугун яратилаётган шароитлардан самарали фойдаланиб, ўз билим ва салоҳиятини юксалтириши лозимлиги, юрт келажаги учун муносиб кадр бўлиб етишиши зарурлиги алоҳида қайд этилди. Шунингдек, экологик муаммоларни юмшатишда ҳам аёл-қизларнинг ўрни муҳимлиги таъкидланди.

М.Комилова, ЎзА