Бухоро вилояти ҳокими Ботир Зарипов Хитойнинг чиқиндиларни қайта ишлаш ва чиқиндидан энергия ишлаб чиқариш соҳасидаги етакчиларидан бири – “Wangneng Environment Co., Ltd.” компанияси  мутасаддилари билан учрашди.

Учрашувда ZOOM платформаси орқали қатнашган компания инвестиция департаменти раҳбари Хуанг Ёнг Ўзбекистонда чиқиндиларни қайта ишлаш тизимини ислоҳ қилиш бўйича амалга оширилаётган ишларга юқори баҳо берди. Инвесторларга берилаётган имтиёзлардан фойдаланиб, компания томонидан бу борадаги муаммоларни ҳал этиш мақсадида Бухоро вилоятида чиқиндиларни замонавий технологиялар асосида қайта ишлаш ва энергия ишлаб чиқариш лойиҳасини амалга оширишга киришилганини қайд этди.

Учрашувда томонлар лойиҳани амалга ошириш билан боғлиқ ташкилий масалаларни ҳам кўриб чиқди. Компаниянинг Ўзбекистондаги координатори Эллин хоним бу лойиҳа самарали ҳамкорлик ва ишонч туфайли амалга оширишга киришилганини айтди. Вилоятнинг атроф муҳитни яхшилаш, ижтимоий-иқтисодий ривожлантиришига ҳисса қўшишдан мамнун эканини билдирди.

Вилоят раҳбари ҳамкорликда амалга оширилаётган лойиҳа ҳудуднинг иқтисодий салоҳиятини янада оширишга ва электр энергия таъминотини яхшилашга ҳисса қўшишини таъкидлади.

Мазкур лойиҳа қиймати 180 миллион АҚШ долларини ташкил этиб, унинг амалга оширилиши чиқиндиларни полигонларда йиғилишини кескин камайтириш, экологик ҳолатни яхшилаш ва энергетика соҳасида барқарорликка эришиш, шунингдек, кўплаб янги иш ўринларини яратиш имконини беради. 

Зариф Комилов, ЎзА мухбири.