O‘zbekiston Ekologiya, atrof-muhitni muhofaza qilish va iqlim o‘zgarishi  vaziri Aziz Abduhakimov boshchiligidagi delegatsiya Turkiyada bo‘lib o‘tgan “Zero Waste” xalqaro forumida ishtirok etdi.

Chiqindisiz ishlab  chiqarish,  ularni qayta ishlash va barqaror rivojlanish tamoyillarini ilgari surish maqsadida tashkil etilgan tadbir BMT rasmiylari, turli mamlakatlarning vazir,  ekspert, tadbirkor, ilmiy va  ijtimoiy doira vakillarini bir joyga jamladi.

Anjumanda O‘zbekiston delegatsiyasi “Zero Waste – global majburiyatlar”  ko‘rgazmasi bilan tanishib, mazkur konsepsiyani rivojlantirishga bag‘ishlangan yalpi majlisda ishtirok etdi. 

Tadbir doirasida vazir Aziz Abduhakimov BMT Taraqqiyot dasturining  aholi punktlari  bo‘yicha ijrochi direktori Anaklaudiya Rossbax, AQSHning Kolumbiya  universiteti  professori  Djeffri Saks, Turkiya atrof-muhit, urbanizatsiya va iqlim o‘zgarishi vaziri Murat Kurum hamda Turkiya qishloq va o‘rmon xo‘jaligi vaziri Ibrohim Yumakli bilan uchrashdi.

Muzokaralarda atrof-muhitni muhofaza qilish sohasidagi hamorlikni kengaytirish, “yashil” texnologiyalarni joriy etish, yerdan barqaror foydalanish va ilmiy tadqiqotlar almashishuvini yo‘lga qo‘yish masalalari muhokama qilindi. 

Mamlakatimiz delegatsiyasi forumda “yashil” iqtisodiyotni rivojlantirish,  muqobil energiya  manbalariga o‘tish va  chiqindilarni qisqartirish bo‘yicha milliy dasturlarni taqdim etdi. Iqlim bo‘yicha majburiyatlarni amalga oshirish va  tabiiy resurslardan oqilona foydalanish tamoyillarini ilgari surishga qaratilgan tashabbuslarga alohida e’tibor qaratildi. 

Aziza Alimova tayyorladi, O‘zA