Хитойнинг “Heihe Rural Commercial Bank” қишлоқ тижорат банки ЕИ томонидан киритилган санкция туфайли Россиядан тўлов қабул қилишни тўхтатди, деб ёзди “Ведомости” газетаси маҳаллий икки банк ва тўрт импорт қилувчи компаниядаги манбаларига таяниб.

Қайд этилишича, ушбу банкка нисбатан санкция 19 июль куни эълон қилинган.  

Европа Иттифоқи Кенгаши ҳисоботида Россияга қарши чекловга қарамай, молиявий тузилма криптоактив билан боғлиқ хизмат кўрсатишда давом этгани таъкидланган.

Қарор 9 августдан кучга кириб, шу кундан бошлаб Европа Иттифоқи ҳудудида яшайдиган жисмоний шахсларга мазкур Чин банки билан ҳар қандай амалиёт тақиқланди.

Маълум қилинишича, “Heihe Rural Commercial Bank”га  тўлов санкция жорий этилгандан кейин ҳам бир ой давомида одатий тартибда амалга оширилган. Ўтган ҳафтада муаммолар юзага чиққан — банк пул қабул қилишни тўхтатган. Етказиб берувчи сўровига жавобан, банк тизим янгиланишига ишора қилган ва ушбу жараён тугагач, вазият яхшиланишига ишонч билдирган. Амалиёт тикланиши муддатига эса аниқлик киритилмаган.

Бошқа бир кредит ташкилоти менежери ҳам “Heihe” Россиянинг барча банклари билан ҳисоб-китобни тўхтатганига эътибор қаратган.

С.Раҳимов, ЎзА