Бугун Люксембургда бўлиб ўтадиган йиғилишда Европа Иттифоқи ташқи ишлар вазирлари томонидан Россияга қарши тўхтаб қолган 19-санкция пакетини тасдиқлаш, шунингдек Киевга ҳарбий ва молиявий ёрдам кўрсатиш мавзуси кўтарилади.

ЕИ жорий йил август ойида сўнгги чеклов чорасини муҳокама қила бошлаган, Брюссель мунозара сентябрь ойида якунланишига умид билдирган эди. Келишув Венгрия ва Словакия қаршилиги туфайли тўхтаб қолган. Ҳозир ушбу санкция тўплами аъзо давлатлар доимий вакиллари билан техник муҳокамадан ўтказилмоқда.

- ЕИ Кенгаши Россияга босимни кучайтириш, жумладан навбатдаги санкция тўплами доирасида соя флоти фаолиятини чеклаш чорасини кўриш, РФнинг гибрид фаолиятига қарши туриш масаласини кўриб чиқади, - дейилган йиғилиш кун тартиби тўғрисидаги баёнотда.

Аввалроқ, ЕК 2027 йилгача Россиядан суюлтирилган табиий газ импортини тақиқлаш, турли импорт-экспорт чораларини қўллаш, банк сектори ва крипто валютага қарши ҳамда айрим шахс ва ташкилотларга нисбатан санкцияни ўз ичига олган янги чекловлар бўйича таклиф киритган. Шунингдек, кўҳна қитъа компанияларига РФ ҳудудидаги махсус иқтисодий зоналарга сармоя киритиш, Россия самолёти ва кемаларини сотилгандан кейин беш йил давомида қайта суғурталаш, Европа субъектларига ҳарбий техника сотишда фойдаланиладиган ЕИга аъзо бўлмаган портлар билан бизнес юритишни тақиқлаш ҳам режалаштирилган. Ушбу чора-тадбирлар, ҳатто, туризм сектори ва ЕИ давлатларидаги россиялик дипломатлар фаолиятига ҳам таъсир қилиши мумкин.  

С.Раҳимов, ЎзА