Европа Иттифоқига аъзо давлатлар етакчилари Брюсселда бўлиб ўтган саммитда Грузияга номзод мамлакат мақомини берди, дея маълум қилди Еврокенгаш раҳбари Шарль Мишель. Шунингдек, у Украина ва Молдова билан ҳам айни масалада музокара бошлашга қарор қилинганини билдирган.

Етакчилар Босния ва Герцеговинага нисбатан худди шундай келишув юзасидан бир қарорга келолмаган. Еврокенгаш раҳбари таъкидлашича, ушбу мамлакат аъзолик талабига жавоб бериш даражасига чиққандан кейингина Брюссель тегишли музокарани бошлайди.

2022 йил июнда бўлиб ўтган саммитда Украина ва Молдовага номзодлик мақоми берилган, Грузия эса айни мақомни ололмаган эди. Ўшанда Тбилисига 12 шарт қўйилган. Жорий йил сентябрда ЕИ дипломатияси раҳбари Жозеп Боррель ушбу Кавказ орти республикаси фақат уч шартни бажарганини айтган.

Экспертлар таъкидлашича, номзодлик мақоми берилиши ёки ушбу масалада музокара бошланиши муайян мамлакат албатта қабул қилинишини билдирмайди. Қолаверса, номзодлик мақомини бериш Брюсселга ҳеч қандай мажбурият юкламайди.

Масалан, Туркия 1999 йил, Шимолий Македония 2005 йил номзод сифатида тан олинган. Кейин Черногория (2010) ва Сербия (2012) номзодлик мақомини олган. Европа Иттифоқига энг сўнгги аъзо – Хорватия 10 йилга чўзилган жараёндан кейин, 2013 йил аъзоликка қабул қилинган.