Еврокомиссия Африканинг энг қашшоқ мамлакатлари кўҳна қитъага муҳожирлар оқимининг олдини олмаса, ушбу давлатларга ёрдам қисқаришини иддао қилмоқда. Бу ҳақда “Politico” нашри ЕИнинг 2028-2035 йилларга мўлжалланган бюджет режаси лойиҳасига таяниб ёзган.

Таъкидланишича, Брюссель муҳожирларни тўхтатиш бўйича 2023 йил Тунис билан эришилган битимга ўхшаш келишувга эришмоқчи. Ўшанда Тунисга Шимолий Африкадан келаётган ноқонуний муҳожирлар Европага ўтадиган асосий йўл – Ўрта ер денгизида қайиқларни тўсишга ёрдам бериши эвазига 1 миллиард евродан кўп маблағ ваъда қилинган эди. Дарвоқе, ўтказиш чоғи маблағ 127 миллион камайтирилган. Шундан сўнг Тунис келишувни инкор этиб, ЕИдан олинган дастлабки 60 миллион еврони қайтарган.

Шимолий Африка мамлакатлари учун мўлжалланган навбатдаги режани Европа Комиссияси раҳбари Урсула фон дер Ляйен келаси чоршанба куни тақдим этиши кутиляпти. Бинобарин, мазкур лойиҳа йўлга қўйилиши учун ҳали Европа парламентидаги социал-демократлар ва яшиллар розилиги олиниши керак.

С.Раҳимов, ЎзА