Египет Францияның 30 Rafale истребителін сатып алу туралы келісімшартқа отырды. 4 мамырда елдің қорғаныс министрлігі бұл жөнінде хабарлады.

Келісімге сай Француздық Dassault Aviation компаниясы шығарған жойғыш ұшақтар Египетке кем дегенде 10 жылдық несие шарттарымен жеткізілетін болады. Бұл типтегі ұшақтар ұзақ мерзімді миссияларды, жоғары маневрлілі және электронды соғыс жағдайында тапсырмаларды орындау мүмкіндігімен ерекшеленеді.

Француздық Disclose басылымы 26 сәуірде Каир мен Париж арасында Египет президенті Абдель Фаттах ас-Сисидің бастамасымен әртүрлі қару-жарақ сатып алу туралы үш келісім жасалғанын хабарлаған. Сатып алынған қарудың құны, БАҚ-тағы мәлімет бойынша 3,95 миллиард еуроны құрайды. 

2015 жылдың ақпанында Египет Франциядан 24 Rafale жауынгерін сатып алу туралы келісімшартқа қол қойды. Мәміле сомасы, француз дереккөздеріне сәйкес, шамамен 5,2 миллиард еуроны құрады.