Бундан икки йил муқаддам урганчлик Оғабек Маткаримов ва унинг турмуш ўртоғи Зилола Матчанова (исм-шарифлар ўзгартирилган) ўртасидаги аҳилликка путур етди.

Натижада, оиланинг моддий таъминоти аро йўлда қолди. Оғабек ишлаб, оиласини боқишга ҳаракат қилмади. Ҳатто, ўз фарзандининг моддий таъминотидан ҳам қўл силтади. Бу ҳолдан зада бўлган Зилола судга мурожаат қилиб, алимент тўлови масаласини ўртага кўндаланг қўйди. Суднинг қабул қилган қарори Оғабек учун сабоқ бўлмади. Натижа такрорий суд мажлисига етаклади. Бу сафар суд масъулиятсиз отага 8 сутка маъмурий қамоқ жазоси тайинлади.

Бу жазодан ҳам ўзига тегишли хулоса чиқармаган Оғабек вояга етмаган фарзандларининг моддий таъминоти учун икки ойдан ортиқ муддат давомида 11,7 млн. сўм алимент пулларини тўлашдан бўйин товлаб келган. Мажбурий ижро бюроси Урганч шаҳар бўлими томонидан О.Маткаримов Ўзбекистон Республикаси ЖКнинг 122-моддаси 1-қисмида назарда тутилган жиноятни содир қилганликда айбланиб, жиноят иши айблов далолатномаси билан судга оширилган.

Қочоқ куёв шундан сўнггина қилмишлари оқибатию, жазонинг муқаррарлигини тушуниб етди. Қилмиши учун астойдил пушаймон бўлиб, турмуш ўртоғидан кечирим сўради. Жами 11,7 миллион сўмлик алимент тўловини ҳам адо этди. Бошқача айтганда, ўртада ярашув муҳити пайдо бўлди. Суд ярашув битимини маъқуллади.

– Бундай қилмишим учун бир йил муддатгача озодликдан маҳрум этилишим ҳам мумкин эди, – дейди Оғабек. – Айбимни англаб, Зилоладан кечирим сўраганим, у эса ўтинчимни қабул қилгани жонимга оро кирди. Давлатимизнинг кечиримлиликка қаратилган муруввати биз каби адашганларни тўғри йўлга солибгина қолмасдан, ножўя қилмишлардан ҳам қайтаради.

М.Қосимова, ЎзА