Яқин келажакда Африка қитъасида аҳоли сони бўйича иккинчи йирик мамлакат ҳисобланган Эфиопия йўлларида фақат электр транспорт воситалари ҳаракатланади. Бундай қарорга келиш учун арзирли сабаб бор: ўтган йил давлат қазиб олинадиган ёнилғи импортига қарийб 6 миллиард доллар сарфлаган. Айни маблағнинг ярмидан кўпи автомобил ёнилғисига тўғри келган.

Транспорт ва логистика вазири Алему Симе миллий логистика режасини қатъий эълон қилди:

– Қарор қабул қилинди: ноэлектр транспорт воситаларининг Эфиопияга кириши тақиқланади.

Чеклов сиёсатидан кўзланган асосий мақсад зарарли чиқиндини ва шаҳар марказида шовқин даражасини камайтириш.

Мамлакатга кириб кела бошлаганда, электромобилга талаб кам эди, аммо бутун дунё бўйлаб ёнилғи нархи ошиши ва жорий тақиқ туфайли эфиопияликлар электромобилга ўтишга мажбур бўлмоқда. Энг оддий шундай машина тахминан икки минг евро туради. Электр транспорт воситасини ишлатиш ҳам қулай, чунки бу давлатда ток нисбатан арзон. Африка бўйича энергия салоҳияти энг юқори бўлган Эфиопиядаги давлатга қарашли энергетика компанияси – EELPA маълумотига кўра, мавжуд электр станцияси қуввати ҳозир 5249 МВт. Бу мамлакатни электр узатиш соҳасида қитъа кашшофига айлантиради. Ҳатто, қайта тикланадиган энергия манбаларини ривожлантиришда сезиларли ютуқларга эришган қўшни Кения ҳам бундай натижага эриша олмайди.

Афсуски, Эфиопияда электр транспортига ўтиш жараёни муаммосиз кечмаяпти. Автомобил сотувчилари ва электр транспорти воситаси ҳайдовчилари машинани уйда қувватлантириши керак. Ҳозирча қувват берувчи жамоат станциялар мавжуд эмас.

Автомобилга эгалик қилиш бўйича жаҳонда энг паст кўрсаткичлардан бири айнан 122 миллион киши истиқомат қиладиган Эфиопияга тегишли. Бу давлатда ҳар минг фуқарога икки машина тўғри келади.