Футбол бўйича Европа чемпионлар лигаси умумий босқичининг 7-туридан ўрин олган барча учрашувлар ўз якунига етди.

Мазкур турнинг сўнгги кунги баҳсларида “Галатасарой” ўз уйида “Атлетико Мадрид” жамоаси билан 1:1 ҳисобида дуранг ўйнаган бўлса, “Бавария” 2:0 ҳисобида “Юнион”ни таслим этишни уддалади. Беллашувдаги иккита гол ҳам Ҳарри Кейн томонидан киритилди.

“Челси” ҳамда “Пафос” жамоалари ўртасидаги ўйин 1:0 ҳисобида якунланди. “Марсель” мезбони бўлган “Ливерпуль” рақиб дарвозасига жавобсиз 3 та гол урди ва сафардан муҳим ғалаба билан қайтди. "Барселона" сафарда "Славия Прага" билан куч синашиб, 4:2 ҳисобида ғолиб бўлди.  

Шунингдек, “Атлетик Бильбао” – “Аталанта” 3:2, “Ньюкасл” – “ПСВ” 3:1, "Ювентус" – "Бенфика" 2:0 ҳисоблари қайд этилди.

Европа чемпионлар лигасининг гуруҳ босқичи 7-тур ўйинлари якунига кўра, “Арсенал” 21 очко билан жадвалда ҳамон етакчилик қилаётган бўлса, “Бавария” 18 очко билан иккинчи, “Ливерпуль” ва “Реал Мадрид” 15 очко жамғарган ҳолда 3-4 ўриндан жой олди. “Тоттенҳэм” эса 14 очко билан кучли бешликни якунлаб берди.

Ҳисобида бир ҳил 13 тадан очко бўлган “ПСЖ”, “Ньюкасл”, “Челси”, “Барселона”, “Спортинг”, “Манчестер Сити”, “Атлетико Мадрид” ва “Аталанта” клублари голлар нисбатига кўра, 6–13 поғоналарда қайд этилмоқда. “Интер” ва “Ювентус” 12, “Боруссия Дортмунд” 11, “Галатасарой” ҳамда “Қорабоғ” 10 очко билан кейинги ўринларда жойлашди.

“Марсель”, “Монако” ва “Байер” 19–21-поғонадан жой олган. Жадвалнинг 21-ўрнида “ПСВ” бормоқда. “Атлетик”, “Олимпиакос”, “Наполи” ҳамда  “Копенгаген” 8 очко тўплаб, 22-26 поғоналарни банд этди. “Брюгге” эса 7 очко билан 27-ўринда. “Будё-Глимт”, “Бенфика”, “Пафос”, “Юнион” ва “Аякс” 6 очко эвазига 28-32 ўринларда бормоқда.

ЕЧЛ мусобақасида муваффақиятсиз иштирок этаётган “Айнтрахт”, “Славия Прага”, “Вильярреал” ва “Қайрат” клублари жадвалнинг қуйи поғонасидан жой олган.

Шуни таъкидлаб ўтишимиз лозимки, ЕЧЛ мусобақасининг жорий мавсумида Англиянинг "Арсенал", "Ливерпуль", "Тоттенҳэм", "Ньюкасл", "Челси" ва "Манчестер Сити" клублари умумий босқич якунига бир тур қолганида плей-оффга чиқишни кафолатлади.  

Дарвоқе, улар орасида "Арсенал" аллақачон тўғридан-тўғри 1/8 финалга йўл олган. Қолган АПЛ жамоалари эса ҳозирча плей-оффнинг саралаш босқичига чиқиши таъминланди.  

Жавоҳир Тошхўжаев,

ЎзА