Баҳорнинг илк кунини жаҳон дзюдосининг етакчилари “Катта дубулға” турнири билан Тошкентда қарши олаётгани, ер куррасининг турли бурчакларидаги минг-минглаб спорт ишқибозлари нигоҳини юртимизга қаратгани ўзига хос воқеа бўлди.

68  мамлакатнинг 500 га яқин маҳоратли дзюдочилари “Катта дубулға” турнири баҳслари орқали "Париж-2024" Олимпиадасининг муҳим рейтинг очколарини қўлга киритиш учун беллашувларда иштирок этмоқда. 

Бугун, 1 март куни ўтказилган беллашувларда аёллар 46, 52, 57 килограммда, эркаклар 60 ва 66 килограммда ғолиблик учун кураш олиб борди. 

Шиддатли баҳсларда иштирок этган 19 нафар спортчимиздан 3 нафари медаллар учун курашиш имкониятини қўлга киритди. 

Терма жамоамиз аъзоларидан Дилшодбек Баратов, Камолиддин Бахтиёров, Баҳром Ботуров, Муҳриддин Тиловов, Абдураҳим Нутфуллоев, Бобур Ваджиев, Ҳалимажон Қурбонова, Фотимахон Турсунбоева, Улбусин Ҳакимова, Лазиза Ҳайдарова, Сита Қадамбоева, Муҳайё Аҳматова, Шукуржон Аминова, Нилуфар Ермаганбетова, Фарангиз Максетбаева, Юляна Режепова саралаш беллашувларида рақибларига йўл берди. Тошкент татамиларидаги “Катта дубулға” турнири улар учун кейинги мусобақаларга тайёргарликнинг муҳим босқичи бўлиб қолди.  

"Париж-2024" Олимпиадасининг рейтинг очколари ва халқаро турнир медаллари учун кураш олиб борадиган 60 кг. вазн тоифасида Достон Рўзиев, 52 кило оғирликдаги Гулҳаё Жўраева, 66 килограммли Сардор Нуриллаевнинг "Париж-2024" йўлидаги муҳим балларга эга чиққани аҳамиятли бўлди. 

Эртага, 2 март куни халқаро турнирнинг иккинчи кунги баҳсларида дзюдочи йигитлар 73, 81 ва 90 килограммда, аёллар 63 ва 70 кило оғирликдаги беллашувларда медаллар учун курашларни ўтказади. Эртанги баҳсларда терма жамоамизнинг 12 нафар эркак ва 8 нафар аёл дзюдочилари татамига чиқади. Улар орасида маҳоратли дзюдочиларимиз Муроджон Йўлдошев, Шаҳрам Аҳадов, Обидхон Нўмонов, Шарофиддин Болтабоев, Ҳикматуллоҳ Тўраев, Давлат Бобонов қатори Мусо Собиров, Нурбек Муртазоев, Шаҳзодхўжа Шарипов, Жалолиддин Қурбонмуродов, Азизбек Авазмуродов, Муҳаммад Жумаев сингари ёшларимиз ҳам ўз омадини синовдан ўтказади. Шунингдек, аёллар ўртасидаги 63 килограмм вазнда Севинч Исоқова, Маржона Нуруллоева, Сарвиноз Ҳусанова, Фарангиз Ҳожиева, 70 кило оғирликда Гулноза Матниязова, Шоҳиста Назарова, Барчиной Қодирова, Хуршида Раззоқбердиева “Катта дубулға” шавқидан баҳра олади.  

<iframe width="650" height="420" src="https://www.youtube.com/embed/XgtWZc9VrlA" title="Dzyudo: Toshkent bellashuvlari shiddati dunyoga yoyilmoqda" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" allowfullscreen></iframe>

Мусобақалар 3 мартга қадар давом этади. 

Т.Рўзиев, А.Содиқов (видео), ЎзА.