Куни кеча Бирлашган Араб Амирликлари пойтахти Абу-Даби шаҳрида дзюдо бўйича якунланган “Катта дубулға” турнири яна тўрт йилдан кейин Лос-Анжелес шаҳрида бўладиган ёзги Олимпия ўйинларига рейтинг очколарни жамғариш учун кечадиган катта кураш маршини бошлаб бергани билан аҳамиятли бўлди.

Хўш, янги Олимпия циклини бошлаб берган илк “Катта дубулға” турнирида дунё дзюдочилари қаторида мамлакатимиз вакиллари эришган натижалар кўнгилдагидекми?

29 мамлакатнинг 220 нафарга яқин дзюдочиси иштирок этган нуфузли турнирда энг ёш таркиб билан қатнашган терма жамоамиз аъзолари 2 та бронза медалига сазовор бўлди. 1 нафар дзюдочимиз кучли бешликдан, 4 нафари еттиликка кўтарилди. Ўзбекистон терма жамоаси умумжамоада медалларга эгалик қилган 18 та давлатдан бири бўлди.

Халқаро турнирнинг биринчи кунида Ўзбекистон терма жамоаси аъзоларидан Муҳриддин Тилововнинг -66 килограммда 3-ўринни қўлга киритиши, сўнгги кунги беллашувларда Ўткирбек Тўрабоевнинг +100 кило оғирликда кучлилар билан беллашиб, бронза медали соҳибига айланишини, -90 килограммда ёш спортчимиз Нурбек Муртазоевнинг 5-ўриндан, Камолиддин Бахтиёровнинг, Самариддин Қучқоровнинг -60 килода, аёллар ўртасида Дурдона Низомиддинова ва Фотима Қуромбоеванинг 7-ўриндан жой олишини мамлакатимиз спортида янги номлар бўй кўрсатаётганидан далолат, дейиш мумкин.

Истагимиз, улар орасидан келгусида Диёра Келдиёрова, Давлат Бобонов, Музаффарбек Тўрабоев, Алишер Юсупов сингари жаҳон дзюдосида ўз услубига эга спортчиларимиз етишиб чиқсин.

Т.Рўзиев, ЎзА