АҚШ президенті Джо Байден елдің Өзбекстандағы келесі елшісі қызметіне көп жылдық тәжірибесі бар дипломат Джонатан Хеникті ұсынды.

VOA басылымының дерегінше, Ақ үй бұл туралы 20 мамырда мәлімдеді.

Бұл кандидатураны Конгресстің жоғарғы палатасы – Сенат бекітуі керек. АҚШ-тың қазіргі Ташкенттегі елшісі Дэниел Розенблюм қызметіне кіріскеніне үш жылдан астам уақыт өтті. Розенблюм Хеник толық расталғанға дейін қызметінде қалады.

Джонатан Хеник Нью-Йоркте туған. Ол таяу уақытқа дейін Мемлекеттік департаментте Орталық Азия бойынша аға дипломат қызметінде істеген. Сондай-ақ, ол көп жылдар бойы халық дипломатиясы саласында қызмет етіп, осы саладағы бағдарламаларға үлес қосты.

Қазіргі уақытта Хеник АҚШ қорғаныс университетінің Киберқауіпсіздік және ақпарат колледжінде Мемлекеттік департаментке жауапты. Дипломат жалған ақпаратпен күресудің мықты маманы.