Davlat xavfsizlik xizmatining Sirdaryo viloyati bo‘yicha boshqarmasi xodimlari tomonidan aksiyadorlik tijorat «Xalq banki»ning Ichki audit hamda Ichki nazorat va komplayens departamentlari mutaxassislari hamkorligida o‘tkazilgan tekshiruvlar natijasida, mazkur bankning Sirdaryo viloyati Xovos filialida noqonuniy holat aniqlandi.

Xususan, 2020-2023 yillar davomida qalbaki hujjatlar rasmiylashtirish va (yoki) biron-bir hujjat rasmiylashtirmasdan hamda soxta ma’lumotlardan foydalangan holda jami 3 mlrd. 828 mln. 400 ming so‘m miqdoridagi byudjet mablag‘lari o‘zlashtirish yo‘li bilan talon-toroj qilingan.

Holat yuzasidan DXX Sirdaryo viloyati bo‘yicha boshqarmasi tomonidan Jinoyat Kodeksining 167-moddasi (O‘zlashtirish yoki rastrata yo‘li bilan talon-toroj qilish) bilan jinoyat ishi qo‘zg‘atilib, bankning Xovos filiali bir nafar mas’ul xodimiga nisbatan qamoqqa olish ehtiyot chorasi qo‘llanildi.

Boshqa mas’ullarning xatti-harakatlariga dastlabki tergov davomida huquqiy baho beriladi.

O‘zA