Францияда “Телеграм” асосчиси Павел Дуров сўроқ қилинаётган иш 12 турдаги жиноятга алоқадор, дея маълумот берди Париж прокуратураси матбуот хизмати “РИА Новости” агентлигига.

Айблов рўйхатида уюшган гуруҳ томонидан жиноятни легаллаштириш, жиноят содир этиш мақсадида гуруҳ тузиш, турли криптографик восита ва хизматни ноқонуний тақдим этиш қайд этилган. Мазкур иш бўйича тергов ҳужжатига ноқонуний амалиёт олиб боришга рухсат берувчи онлайн платформа маъмурияти, вояга етмаганларнинг беҳаё тасвирини тарқатиш ва сақлаш, дори воситаларини сотиб олиш, ташиш, сақлаш ёки жўнатиш, уюшган гуруҳ томонидан содир этилган фирибгарлик, ахборотни қайта ишлайдиган автомат тизимни бузиш ва жараёнга кириш учун мўлжалланган, мослаштирилган асбоб-ускуна, дастур ёки маълумотни ноқонуний узатиш ёки тақдим этиш сингари айблов шакллари ҳам киритилган.

Қайд этилишича, қонун доирасида ушлаш учун ваколатли идора сўровига кўра ахборот ёки ҳужжат тақдим этиш рад этилгани ҳам иш қўзғаш учун асос бўлган. Шунингдек, тадбиркорни ҳибсга олиш ташаббуси Париж прокуратураси Кибер жиноятчиликка қарши кураш бўлимидан чиққани қўшимча қилинган. Эслатиб ўтамиз, Дуровни ҳибсда сақлаш муддати кўпи билан 28 августгача узайтирилиши мумкин, яъни 96 соатдан ошмаслиги керак.

Шанба куни кечқурун француз ОАВ “Телеграм” мессенжери асосчиси Павел Дуров Ле-Бурже аэропортида қўлга олингани ҳақида хабар тарқатди. Тадбиркор Парижга Озарбайжондан шахсий самолётида келган. Франция фуқаролигига эга Дуров мамлакатда қидирувга берилганлар рўйхатига киритилган экан. Адлия тизими тадбиркорни бир неча сабаб, жумладан Телеграм мамлакат расмийлари билан ҳамкорлик қилишдан бош тортгани учун жиноятга алоқадор, деб ҳисоблайди. Маҳбус терроризм, гиёҳванд моддалар савдоси, фирибгарлик ва пул ювишда ҳам айбланиши мумкин.

Россиянинг Франциядаги элчихонаси Париж ҳозирча ҳодиса бўйича ҳамкорлик таклиф қилмаганини айтди.

Тахминларга кўра, ишбилармон 20 йилгача қамоқ жазоси олиши мумкин.

С.Раҳимов, ЎзА