Кўчат экиб, боғ яратиш — халқимизнинг азалий қадриятларидан бири. Зеро, ўзимиз яшаб турган жойни обод қилиш ва кўкаламзорлаштириш туфайли кўнглимиз ҳам обод бўлади, турмушимиз янада файзли кечади.

Жорий йилнинг 30 май куни Президентимизнинг “Яшил макон” умуммиллий лойиҳаси доирасида ҳамда ўрмонларни бошқариш тизимида ислоҳотларни изчил давом эттириш, яшил ҳудудларни кенгайтириш чора-тадбирлари тўғрисида”ги фармони эълон қилинганди. Унда жамоатчилик иштирокини янада ошириш кўзда тутилган.  

Ўзбекистон Миллий Ахборот агентлиги жамоаси ушбу ташаббусни қўллаб-қувватлаш мақсадида Бурчмулла давлат ўрмон хўжалиги ерларида “Дунёни яшиллик қутқаради”  деб номланган акцияни ўтказди. Унда ижодкорлар, техник ходимлардан иборат 20 нафар кўнгилли иштирок этди. Шунингдек, ўрмон хўжалиги ходимларидан ҳам яна шунча ҳашарчи тадбирда фаол қатнашди. Шу куни жами 200 тупга яқин ниҳол она заминга қадалди.  

Бурчмулла давлат ўрмон хўжалиги 1947 йилда ташкил топган бўлиб, умумий ер майдони салкам 380 000 гектарни, шундан ўрмон билан қопланган майдони 80 минг гектардан зиёдни ташкил қилади. Хўжаликда 55.4  гектар ўрмон ниҳолхоналари мавжуд бўлиб, унда кўчатларнинг ҳудудга мос ўнлаб турлари етиштирилади. Ўрмон хўжалиги кўчатхоналарида ҳар йили 1.5 миллион туп ниҳол тайёрланади. Шу билан бирга ҳар бир ҳудудга бириктирилган ходим кўчатнинг ўз вақтида суғорилиши, биотехник чора-тадбирлари, зараркунандаларига қарши кураш ишларини назорат қилиб боради. Ундан ташқари ўрмон нозирлари ҳам назорат тадбирларини олиб борадилар.  

Айтиш керакки, сўнгги йилларда жаҳонда кузатилаётган иқлим ўзгариши билан боғлиқ глобал муаммолар, афсуски, юртимизни ҳам четлаб ўтаётгани йўқ. Рўй бераётган чанг-тўзонлар, шунингдек, ёғингарчиликнинг камайиб кетаётгани барчамизни яшиллик оламини кўпайтиришга чорлайди.  Атрофи Тянь-Шань ва Чотқол тоғ тизмалари билан ўралган ушбу ҳудуд шоирларимизга ҳам илҳом манбаи бўлди.    

Албатта бундай тадбирлар инсонларга рухий озуқа ва жисмоний куч ҳам бағишлайди. Шу куни жамоа тоғ этакларига ва қирга кўтарилиб, ҳар қанча меҳнат қилишсада ҳеч бирларида чарчоқ аломатлари сезилмади. Чунки, бу қилинаётган эзгу амалларни қўллагувчиси бор – у ҳам бўлса Она-табиатдир.  

<iframe width="640" height="420" src="https://www.youtube.com/embed/J9g_ABkwP4I" title="Dunyoni yashillik qutqaradi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Санжар Тошпўлатов, Ёқубжон Мелибоев, Улуғбек Тўхтаев (видео), ЎзА