Байден ва Си Цзиньпин тез орада телефон орқали мулоқот қилиши мумкин

АҚШ етакчиси Жо Байден ва Хитой раҳбари Си Цзиньпин яқин ҳафталарда телефон орқали мулоқот қилишни режалаштирмоқда, дейилади Оқ уй сайтида чоп этилган матбуот хабарномасида.

Аввалроқ Президентнинг Миллий хавфсизлик бўйича маслаҳатчиси Жейк Салливан Хитойга ташрифи доирасида Си Цзиньпин билан учрашган эди.

– Икки томон ҳам очиқ алоқа йўлларини сақлаб қолиш бўйича давом этаётган саъй-ҳаракатни, жумладан Президент Байден ва Си Цзиньпин ўртасидаги қўнғироқни келгуси ҳафталарга режалаштиришни олқишлади, – дейилган баёнотда. Суҳбат санаси ҳозирча маълум эмас.

Франция собиқ Президенти Маскни шайтонга қиёслади

“CNews” ёзишича, Франциянинг собиқ Президенти Франсуа Олланд америкалик тадбиркор Илон Маскни шайтонга қиёслаган.

– Мен уни Елисей саройида кутиб олишаётганини кўрсам, худди уйимизга шайтон таклиф қилингандек туюлади, – деди у. Афсуски, Эммануэль Макрон бундан уялмагани аниқ.

Амалдаги давлат раҳбари ўтган йил Парижда америкалик тадбиркор билан учрашган. Олланд миллиардернинг нигоҳи унинг инсониятга яхшилик тиламаслигини билдиришини ҳам қўшимча қилди.

Ҳафта бошида Британия парламенти собиқ депутати, мамлакат ишчилар партияси раҳбари Жорж Галлоуэй “Телеграм” асосчиси Павел Дуров Францияда ҳибсга олинганидан кейин Маскни Европага саёҳат қилмасликка чақирган.

Йил бошидан буён Британияга 20 мингдан кўп ноқонуний муҳожир келган 

Йил бошидан буён 20 мингдан ортиқ ноқонуний муҳожир Буюк Британияга Ла-Манш бўғози орқали қайиқда кирган, деб ёзди “Sky News” мамлакат Ички ишлар вазирлиги маълумотига таяниб.

– Бир кун аввал қироллик қирғоғига 614 нафар муҳожир етиб борган. Бу июль ойида Лейбористлар партияси ҳокимият тепасига келгандан бери кунлик иккинчи энг юқори кўрсаткич. Йил бошидан буён эса чегарани 20 433 нафар ноқонуний мигрант кесиб ўтди. Бу 2022 йилдаги рекорд кўрсаткичдан бир неча минг киши кам.

Ямайкада ўсмир акула ҳужумидан ҳалок бўлди

“Jamaica Observer” нашри ёзишича, йиртқич балиқ ўсмирнинг бошини ғажиб ташлаган. Ов пайтида ғойиб бўлган мактаб ўқувчисининг бошсиз танаси қирғоқ яқинидан топилган.

Марҳум Фалмут шаҳрида яшовчи 16 ёшли Жамари Ридники эди.

Ўсмирнинг отаси ўғли душанба куни денгизга чиққанини айтган. Сув остида балиқ овлаш ўсмирнинг севимли машғулоти бўлиб, ота буни ҳеч қачон маъқулламаган. Сешанба куни эрталаб ғаввослар дастлаб денгиздан тишланган қўлни топган, кейин эса жасад соҳилга олиб чиқилган.

Европа Иттифоқи Мадурони тан олмади

Европа Иттифоқи дипломатияси раҳбари Жозеп Боррель Европа Иттифоқи Николас Мадурони Венесуэланинг демократик йўл билан сайланган президенти сифатида тан олмасликка қарор қилганини билдирди.

– Мадуро амалда президентлик қилишда давом этади, бироқ биз унинг демократик қонунийлигини тасдиқлаб бўлмайдиган сайлов натижасига кўра, тан олмаймиз, – деди у ЕИ ташқи ишлар вазирларининг Брюсселдаги норасмий учрашувидан сўнг.

Венесуэлада президент сайлови 28 июль куни бўлиб ўтди. Эртасига Миллий сайлов кенгаши Николас Мадурони 2025-2031 йиллар учун сайланган президент сифатида эълон қилди. У Сайлов кенгаши маълумотига кўра, 51 фоиз овоз олган.

Ғазо ҳукумати: Исроил  зарбаси оқибатида ҳалок бўлганлар сони 40 400 дан ошди.

Ғазо Соғлиқни сақлаш идораси маълумотига кўра, 2023йил 7октябрдан бери Исроилнинг Ғазо секторига уюштирган зарбаси оқибатида ҳаётдан кўз юмганлар сони 40 400 дан ортиб, 93 мингдан ортиқ киши жароҳат олган.

Баёнотда сўнгги 24 соат ичида секторга уч марта зарба берилиши натижасида 71 инсон қурбон берилгани, 112 киши жабрлангани ҳам келтирилган.

Комор ороллари Жаҳон савдо ташкилотига расман қабул қилинди

Жаҳон савдо ташкилоти (ЖСТ) веб-сайтида эълон қилинган баёнотга кўра, Комор ороллари 17 йиллик музокарадан сўнг расман ташкилотнинг 165-аъзосига айланди. Бу қарор 26 февраль куни Абу-Дабида бўлиб ўтган вазирлар даражасидаги 13-конференция доирасида ташкил этилган махсус маросимда маъқулланган.

ЖСТ бош директори Нгози Оконжо таъкидлашича, Комор ороллари энди тузилмадан модернизация ва иқтисодий ўсиш жараёнида, шунингдек мамлакатнинг Африка қитъасидаги минтақавий интеграция дастурини тўлдириш воситаси сифатида фойдаланиши мумкин.

С.Раҳимов, ЎзА