Моди Зеленский билан урушни тўхтатиш масаласини муҳокама қилади
Ҳиндистон Бош вазири Нарендра Моди 23 август куни Украинага ташриф буюриб, урушга қандай барҳам бериш бўйича қарашини баён қилмоқчи. Бу ҳақда у ижтимоий тармоқдаги саҳифасида маълум қилди.
– Зеленский таклифига биноан Украинага бориб, давом этаётган урушни тинч, музокара йўли билан ҳал қилиш истиқболини муҳокама қиламиз, – деди у. – Умид қиламанки, тез орада минтақада тинчлик ва барқарорлик қарор топади.
Моди, шунингдек, мазкур ташриф Ҳиндистон ва Украина ўртасидаги дўстона муносабатни янада чуқурлаштиришига ишонч билдирган.
Пентагон армия учун оғир машиналар ишлаб чиқариш учун шартнома тузди
АҚШ Мудофаа вазирлиги “Oshkosh” компанияси билан оғир армия машиналари етказиб бериш кўзда тутилган 1,54 миллиард долларлик шартнома имзолади.
“Oshkosh Defense LLC” компанияси 1 054 861 429 доллар қийматга эга оғир тактик транспорт воситаси ишлаб чиқариш бўйича шартномага эга бўлди, – дейилган идора хабарида.
Компания сайтида келтирилишича, бундай машинада оғир зирҳли техника, жумладан танк, ҳатто контейнер ҳам ташилади.
ХХР Давлат кенгаши раҳбари Россияга келди
ХХР Давлат кенгаши раҳбари Ли Цян Москвага келди.
“Менинг Россияга ташрифим асрий дўстлигимизни давом эттириш, ўзаро манфаатли ҳамкорликни мустаҳкамлаш бўйича икки давлат раҳбарлари эришган келишувни ҳаётга жорий қилишга қаратилган”, – деди у.
Харрис номзод сифатида расман тасдиқланди
Сешанба куни кечқурун АҚШ вице-президенти Камала Харрис ноябрда бўлиб ўтадиган президент сайловида Демократик партиядан ушбу лавозимга номзод этиб тасдиқланди. Овоз бериш “United Center” ёпиқ спорт аренасида бўлиб ўтди. Делавер штати биринчи бўлиб давлат раҳбарининг ватани сифатида номзодни қўллаб-қувватлади.
Покистон парламенти каламушларга қарши ов мушуклари боқяпти
Покистон парламенти ҳукумат биносида каламуш кўпайиб кетгани боис, мушукларни кўпайтирмоқчи, дея хабар тарқатди “Geo News” нашри манбаларга таяниб.
– Пойтахтни ривожлантириш бошқармаси (CDA) каламушларни тутиш учун овчи мушуклар ёллаш ҳақида қарор қабул қилди, чунки кемирувчилар парламент биносининг ҳамма жойини эгаллаб олган, – дейилган хабарда. – Айни мақсадга бюджетдан 1,2 миллион рупея – тахминан 4,3 минг доллар ажратилди.
Каламушлар Сенатнинг турли департаментлари ва Миллий ассамблея фаолиятига жиддий салбий таъсир кўрсатмоқда. Масалан, зараркунандалар идорадаги кўплаб ҳужжатларни кемириб кетган.
Байден АҚШнинг махфийлаштирилган ядровий стратегиясини имзолади
Мазкур ҳужжат ХХРни тийиб туриш ҳамда Пекин, Пхеньян ва Москва томонидан мувофиқлаштирилган чақириққа қарши тайёр туришга қаратилган, деб ёзди “New York Times” газетаси.
Нашр маълум қилишича, ҳужжат шу даражада махфийлаштирилганки, ҳатто рақамли кўриниши мавжуд эмас, фақат босма қоғозда Пентагоннинг бир неча раҳбари ва миллий хавфсизлик бўйича масъулларга берилган.
Қирғизистонда яна бир банк Россия орқали пул ўтказмасини тўхтатди
Қирғизистоннинг “Керемет” банки сайтида Россия банклари орқали пул ўтказиш тўхтатилгани эълон қилинди.
“Россиянинг “Сбербанк”, “МТС Банк”, “Тбанк” (Тинькофф) банклари мобил иловаси ва Россия миллий тўлов тизими операторлари орқали икки томонга ҳам пул ўтказмаси номаълум муддатга тўхтатилди”, – дейилган эълонда.
Аниқлик киритилишича, “Золотая корона”, “Юнистрим”, “Western Union” ва бошқа халқаро тизимлардан пул ўтказиш мумкин.
Аввалроқ Қирғизистоннинг бошқа бир йирик молиявий тузилмаси – MBank ҳам РФ банкларидан пул ўтказмасини тўхтатганини эълон қилган эди.
Кенияда 42 аёлни ўлдирган қотил полиция идорасидан қочиб кетди
40 дан зиёд аёлни ўлдирганликда айбланаётган кимса – Коллинз Жумаиси Халуша Найробидаги Гигири полицияси идорасидан қочиб кетди, деб ёзди “Citizen Digital” нашри.
Июль ойи ўрталарида Кения полицияси Найробининг қашшоқлар яшайдиган ҳудуди ахлатхонасида бир неча аёл жасадини топган. Кейинроқ ушбу қотилликда гумон қилинган кимса қўлга олинган. Мамлакат жиноят қидирув бошқармаси вакили Муҳаммад Амин маълум қилишича, гумондор 2 йил давомида 42 аёлни ўлдирганини тан олган.
Таъкидланишича, у билан бирга Эритреянинг 12 нафар ноқонуний мигранти ҳам қочган.
С.Раҳимов, ЎзА