Гутерриш: Кўп қутбли дунё тартибсизлик хавфини келтириб чиқармоқда
– Дунёмиз кун сайин хавфга тўлмоқда, – деди БМТ Бош котиби Антониу Гутерриш Женевада Инсон ҳуқуқи бўйича Кенгашнинг 55-чи сессияси очилишида сўзга чиқиб. – Қудратли давлатлар ўртасида ўн йиллаб ҳукм сурган барқарор муносабатдан сўнг биз кўп қутбли даврга қадам қўймоқдамиз. Бу халқаро даражада етакчилик ва адолатни таъминлаш учун янги имконият яратмоқда. Афсуски, кучли халқаро институтларсиз кўп қутблилик тартибсизлик келтириб чиқариши мумкин.
Туркияда шахта ўпирилди
Туркия шарқида юз берган фалокат туфайли одамлар тупроқ остида қолган, дея хабар тарқатди “CNN Türk” телеканали.
Воқеа Элазигедаги Олажакай туманида рўй берган. Дастлабки маълумотга кўра, уч киши кон ичида қолган. Айни пайт қутқарув ишлари олиб бориляпти.
Эквадорда январдан буён ўн миндан ортиқ жиноятчи ҳибсга олинган
Эквадор полицияси ва армияси 9 январь куни мамлакатда фавқулодда ҳолат эълон қилингач, уюшган жиноий гуруҳларга қарши амалга оширилган “Феникс” режаси доирасида 10 мингдан ортиқ кишини ҳибсга олди. Уларнинг 268 нафари террорда айбланмоқда.
Жиноятчилардан 3 минг 40 дона ўқ отар қурол, 19 919 дона портловчи қурилма мусодара қилинган.
Ҳиндистонлик фермерлар пойтахтга тракторларда келишмоқда
Февраль ўрталарида норозилик чиқишларини бошлаган ҳиндистонлик фермерлар мамлакат пойтахтига қараб трактор ва бошқа қишлоқ хўжалиги техникаларида юриш бошлади, деб хабар тарқатди “NDTV” телеканали.
Фермерлар қишлоқ хўжалиги маҳсулотларининг энг кам нархини қўллаб-қувватлаш тўғрисида қонун чиқарилишини талаб қилмоқда. Шунингдек, намойишчилар ёши 60 дан ошган фермерларга пенсия берилиши, солиқ камайтирилиши, олинган кредит қайтарилиши бекор қилиниши каби талабларни ҳам илгари суряпти. Қолаверса, Ҳиндистоннинг Жаҳон савдо ташкилотидан чиқиши ҳамда айрим мамлакатлар билан эркин савдо бўйича келишув музлатилиши каби талаблар ҳам қўйилмоқда.
Бербок Путин ҳақида кескин баёнот берди
Украина можароси учун Россия Президенти Владимир Путинга босим ўтказиш керак, деди Германия ташқи ишлар вазири Анналена Бербок “ZDF” нашрига берган интервьюсида.
– Ҳозир Путин тинчлик истамаяпти, –деди Бербок. – У урушни тўхтатмоқчи эмас. Бинобарин, ҳарбий ҳаракат эртагаёқ тўхтатилиб, танклар олиб чиқиб кетилиши мумкин. Биз Украинани ҳарбий мақсадда қўллаб-қувватлашни давом эттиришимиз керак.
Бундан ташқари, ГФР ташқи сиёсат маҳкамаси раҳбари Хитой, Эрон ва Шимолий Кореяга ҳам босим ўтказиш кераклигини айтган.
Байден Украина масаласида конгресс етакчилари билан учрашади
Оқ уй раҳбари конгрессни Украинага ёрдам кўрсатишга қаратилган қонун лойиҳасини маъқуллашга ундаб кўради.
Киевга 60 миллиард доллардан кўпроқ маблағ ажратилиши демократлар назорати остидаги сенат аъзолари томонидан маъқулланган. Қонун лойиҳасини маъқуллаш жараёни республикачилар кўпчиликни ташкил этадиган Вакиллар палатасига келиб тўхтаб қолган.
Рим папаси Украина можароси қачон тугашини билмайди
Рим папаси Франциск яна бир бор Украина можаросига дипломатик йўл билан ечим топиш кераклигини таъкидлади.
– Украинада кенг кўламли ҳарбий амалиёт бошланганига икки йил тўлди, – деди у Ватикандаги чиқишида. – Кўплаб қурбонлар, ярадорлар бор, вайронагарчилик, кўз ёши даврининг охири кўринмаяпти.
Мисрда йўловчи қайиғи чўкиб кетди
Нил дарёсида қурилиш компанияси ишчилари кетаётган қайиқ чўкиб кетиб, саккиз инсон қурбон бўлди.
“Sada El Balad” телеканали ахборотида олти киши қутқариб олингани ҳам қўшимча қилинган. Ҳодиса Гиза музофоти Муншоат Ал-Канатер туманида рўй берган.
Лукашенко 2025 йил президент сайловида иштирок этишини эълон қилди
Беларусь Президенти Александр Лукашенко фикрича, ҳозир шундай даврки, президентликдан кетиш сотқинлик билан баробар.
– Кўплар мени ёқтирмайди, чунки келишувлар, қабул қилинган қарорлар бажарилишини қаттиқ талаб қиламан, – деди Беларусь етакчиси журналистлар билан учрашувда. – Агар кўрсатмадар бажарилмаса, мавжуд ҳукумат устуни вайрон бўлади, жамият чўкади.
Саидмурод Раҳимов, ЎзА