Ҳиндистоннинг Гоа шаҳрида давом этаётган шахмат бўйича жаҳон кубоги ўзининг юқори нуқтасига яқинлашмоқда.

Бугун, 19 ноябрь куни 1/4 финалининг тай-бек баҳслари ўтказилдики, унда ҳамюртимиз Жавоҳир Синдоров мексикалик Хосе Мартинез билан мураккаб кечган ўйинда ғалабага эришди.

Нодирбек Ёқуббоевнинг бир кун муқаддам жаҳон кубогининг чорак финал баҳсида Германия вакили Александр Донченкони тор-мор этиши ва бугун Синдоровнинг тай-брекда зафар қучиши Ўзбек шахмат мактабининг янги тарихий натижаси бўлди, дейиш мумкин.

Энди ҳар икки шахматчимиз жаҳон кубогининг 1/2 финалида рўбарў келадики, бу, 2026 йилги классик шахмат бўйича жаҳон чемпионлигининг номзодлар баҳсида камида 1 нафар ўзбекистонлик шахматчи қатнашиш ҳуқуқига эга чиқишини таъминлаши билан аҳамиятлидир.

Яна бир гап. Ярим финалда Синдоров ёки Ёқуббоев зафар қучишидан  қатъий назар, имкониятни бой берган гроссмейстеримизда ҳам 3-ўрин, ҳам номзодлар турнирида қатнашиш чиптаси учун баҳс олиб бориш ҳуқуқи сақланиб қолади.  

Айни ҳолат ўзбеклар қарама-қаршилигидаги учрашувда мағлуб бўлган шахматчида ҳам жаҳон шахмат тожи учун йўлланма тақдим этадиган даъвогарлар мусобақасида қатнашиш имконияти сақланиб қолади, деганидир.

Бунинг учун чорак финалнинг қолган иккита жуфтлигида ютуққа эришган Андрей Есипенко- Вэй И “дуэли”да мағлубиятга учрайдиган шахматчини 4-ўрин билан кифоялантириши лозим бўлади.

Айтиш лозим, бугун ўтган чорак финалнинг 2 та тай-брек учрашувида хитойлик Вэй И ҳиндистонлик Аржун Эригаисини, Андрей Есипенко АҚШ вакили Сэм Шенклендни тор-мор этди.

Эслатиб ўтамиз, эртага 20 ноябрь куни шахматчилар учун дам олиш куни. 21-23 ноябрда ярим финал баҳслари ўтказилса, 24-26 ноябрда финал ва 3-ўрин учун мусобақалар ташкил этилади.

Т. Рўзиев, ЎзА