Ота-боболаримиздан мерос бўлган курашнинг халқаро спорт тури мақомига кўтарилиши натижасида ўзбекона сўзлар жаҳон спорт терминологиясидан жой олди.

Бугун дунё миқёсида ўтказилаётган кураш турнирларида, чемпионатларида давлатимиз байроғидан жило олган яктакларда спортчиларнинг беллашиши, “ҳалол”, “тўхта”, “чала”, “ёнбош”, “гилам”, “танбеҳ” каби сўзларнинг халқаро спорт майдонларида жаранглаши одат тусига кирдики, бу, Янги Ўзбекистоннинг янги муваффақиятини ёрқинроқ ифода этмоқда. Ўтаётган йил давомида давлатимизнинг қўллаб-қувватлаши билан Халқаро кураш ассоциацияси ва қатор ташкилотлар ҳамкорлигида Ўзбекистон Республикаси Президенти соврини учун "World Series Pro" ва "World Series Masters" турнирларининг йўлга қўйилгани курашнинг халқаро ривожига ижобий таъсир кўрсатди.  

Айтиш лозим, кураш бўйича йил давомида қитъавий чемпионатлар сўнгида "World Series Pro" турнири учун эркаклар 66, 81, 90 килограмм ва аёллар 57, 70 килограмм мутлақ вазн тоифаларида Ўзбекистон Республикаси Президенти соврини учун гиламга чиққани аҳамиятли бўлди.  

Халқаро кураш ассоциацияси тақвим режасига асосан апрель ойида Хитойнинг Ханчжоу шаҳрида Осиё қитъаси, июль ойида Мисрнинг Қоҳира шаҳрида Африка қитъаси, августда Доминикан Республикасининг Санто-Доминго шаҳрида Пан-Америка қитъаси ва октябрь ойида Грециянинг Салоники шаҳрида Европа қитъаси саралаш босқичлари ўз ғолибларини аниқлади.  

Мусобақа низомига кўра, ҳар бир қитъавий босқичда 1- ва 2-ўринни қўлга киритган спортчилар мусобақанинг финал босқичи ҳисобланган "World Series Masters" турнирида иштирок этиш ҳуқуқини қўлга киритади.  

– Ўтказилган қитъавий саралаш турнирларида муваффақиятли иштирок этиб, совриндор бўлган курашчилар жорий йилнинг 22 ноябрь куни Тошкентда "World Series Masters" финалида гиламга чиқади. Айни кунларда ушбу нуфузли мусобақани ўтказиш борасида Ўзбекистон Республикаси Ёшлар сиёсати ва спорт вазирлиги, Миллий олимпия қўмитаси ва Ўзбекистон кураш федерациялари томонидан қизғин ҳозирлик ишлари олиб борилмоқда. Мусобақалар пойтахтимиздаги “Алпомиш” спорт саройида ўтказилади, – дейди Ўзбекистон кураш федерацияси бош котиби Алишер Эшонқулов.  

Таъкидламоқ керак, тўрт қитъанинг саралаш турнирларида совриндорликка эришган курашчилар пойтахтимизда курашнинг жозибасини намойиш этиш билан биргаликда ғолиб полвонга тақдим этиладиган 10 минг, 2-ўрин соҳибига бериладиган 5 минг ҳамда 3-ўринни қўлга киритадиган курашчи қўлга киритадиган 1 000 АҚШ доллари учун беллашади.  

Т. Рўзиев, ЎзА