Мамади Думбуя ўлканинг янги конституциясига мувофиқ, етти йиллик муддатга расман Гвинея президенти сифатида қасамёд қилди, деб хабар бермоқда “Al Jazeera” нашри.

Таъкидланишича, минглаб шахслар ва бир неча давлат раҳбарлари кўз ўнгида бўлиб ўтган маросим Думбая ўтган ойдаги сайловларда ғолиб деб эълон қилинганидан кейин бўлиб ўтди. Яқинда мамлакатда ўтказилган президентлик сайловида у 86,7 фоиз овоз тўплаганди.

Қизиқ томони, аввалига у президентликка номзодини қўймасликка ваъда берган бўлса-да, аммо Думбуя бошқа саккиз номзодга қарши сайловда қатнашди. 

Маросим сўнгида Думбуя ўз халқига унга кўрсатилган ишонч учун миннатдорлик билдириб, давлат қонунлари ва қоидалари, шунингдек, суд қарорларига ҳурмат билан қарашга содиқлигини таъкидлади.

Йиғинда Руанда, Гамбия, Сенегал ва бошқа Африка давлатлари раҳбарлари, Хитой, Нигерия, Гана ва Экваториал Гвинея вице-президентлари, шунингдек, Франция ва АҚШ расмийлари иштирок этди.

Ў.Алимов, ЎзА