Жорий йилнинг 8-19 сентябрь кунлари Дубай шаҳрида Умумжаҳон почта иттифоқи (UPU)нинг 28-конгресси ўтказилмоқда. Ушбу нуфузли анжуманда Рақамли технологиялар вазирлиги делегацияси ҳам иштирок этмоқда.

Маълумот учун айтиш жоизки, UPU 1874 йилда ташкил этилган бўлиб, 1948 йилдан буён БМТнинг почта алоқаси соҳасидаги ихтисослашган ташкилоти ҳисобланади. Бугунги кунда Иттифоққа 192 давлат аъзо бўлиб, унинг штаб-квартираси Швейцариянинг Берн шаҳрида жойлашган. UPUнинг асосий мақсади глобал почта тизимини ташкил этиш ва такомиллаштириш, шунингдек, бу соҳада халқаро ҳамкорлик учун қулай шароит яратишдир.

Ўзбекистон UPUга қўшилган ҳолда почта жўнатмаларининг ўзаро алмашинувини, жумладан транзит эркинлигини таъминлаш, шунингдек, бошқа мамлакатлардан келган почта жўнатмаларини ўз жўнатмаларидек қайта ишлаш мажбуриятини олган.

UPUнинг олий органи ҳисобланган Конгресс аъзо мамлакатлар вакилларидан иборат бўлиб, унинг фаолияти Халқаро бюро, Маъмурий кенгаш, Почта эксплуатацияси кенгаши ва бошқа ишчи органлар орқали амалга оширилади.

28-Конгресс доирасида 6 та Ялпи мажлис ва 28 та Қўмита йиғилиши ўтказилиши режалаштирилган.  Қўмита йиғилишларида эса почта, молия ва электрон хизматларни ривожлантириш, логистика тизимини такомиллаштириш, якуний харажатлар тизими бўйича янгиланган қарорлар қабул қилиш, шунингдек, UPU ҳужжатларига ўзгартиришлар киритиш масалалари муҳокама этилади.

Конгресс доирасидаги энг муҳим воқеалар қаторига Иттифоқнинг юқори раҳбариятини, Почта эксплуатацияси кенгаши ҳамда Маъмурий кенгашнинг 2026-2029 йиллардаги таркибини сайлаш, шунингдек, якуний ҳужжатларни имзолаш киради.

Нигора Раҳмонова, ЎзА