Айни кунларда Дубай шаҳрида “Dubai Expo–2020” халқаро кўргазмаси бўлиб ўтмоқда.

Ўзбекистон энергетика ҳафталигида Энергетика вазирлиги, “Ўзбекнефтгаз” АЖ, “Иссиқлик электр станциялари” АЖнинг лойиҳалари тақдимотлари, “В2В” форматдаги учрашув ва музокаралар ўтказилди.

“Uzbekistan GTL” заводи ва АҚШнинг “Honeywell UOP” компанияси вакиллари ўртасида бўлиб ўтган бизнес-учрашув улардан биридир.

Унда икки томон имконияти ва ҳамкорлик истиқболлари ҳақида сўз юритилди.

Таъкидланганидек, Ўзбекистондаги “GTL” заводи негизида қуввати йилига 100 минг тоннагача бўлган чизиқли алкилбензоллар ишлаб чиқаришнинг қурилиши режалаштирилган. Янги ишлаб чиқариш учун хомашё сифатида GTL керосин ишлаб чиқариш жараёнида ҳосил бўладиган оралиқ маҳсулотлар хизмат қилади.

Чизиқли алкилбензол суюқ совунлардан бошлаб кир ювиш кукунларигача бўлган барча турдаги ювиш воситаларини ишлаб чиқариш учун асосий хомашё ҳисобланади. Бугунги кунда ювиш воситалари бозори энг жадал ривожланаётган бозорлардан бири бўлиб, ҳам республикада, ҳам МДҲ мамлакатларида ЧАБга бўлган талаб сезиларли даражада ошганлиги кузатилмоқда.

Айтиз жоизки, “Honeywell UOP” – АҚШдаги нуфузли компаниялар сирасидан. У нефтни қайта ишлаш, нефт-кимё ва газни қайта ишлаш саноатлари учун қайта ишлаш технологиялари, катализаторлар, адсорбентлар, ускуналар ва консалтинг хизматларини етакчи халқаро етказиб берувчиси ва технологиялар лицензиаридир.

Учрашув якунида томонлар “Uzbekistan GTL” заводи негизида алкилбензоллар ишлаб чиқаришни ташкил этиш бўйича ҳамкорлик меморандумини имзолади.

Ушбу ҳужжат “Uzbekistan GTL” ва “Honeywell UOP” ўртасида ҳамкорликни кенгайтириш баробарида янги ишлаб чиқаришни ташкил этиш бўйича техник-иқтисодий, лицензиялаш ва бошқа ҳужжатларни биргаликда ишлаб чиқишга қаратилган.

Маълумот ўрнида, эртага Дубай шаҳрида “Dubai Expo–2020” халқаро кўргазмаси ўз ишини якунлайди.

Насиба Зиёдуллаева, ЎзА