Мутахассислар қўшилган қиймат солиғини қоплаш (қайтариш)нинг қатор афзалликларини алоҳида қайд этмоқда.

Ҳозирда ҚҚС ставкаси 15 фоиз бўлса, бир йил аввал у 20 фоиз эди. 

– Вазирлар Маҳкамасининг тегишли қарорига кўра ҚҚС салбий фарқ суммасини қоплаш (қайтариш) амалга оширилади,– дейди Солиқ маъмурчилиги бошқармаси давлат солиқ бош инспектори Ўткир Бўтаев.– Бошқача айтганда, солиқ тўловчи ортиқча тўлаган ёки ортиқча ундириб олинган қўшилган қиймат солиғи маблағларини қайтариб олиш ҳуқуқига эга.

Бунинг учун солиқ тўловчилар ҚҚС суммасини қоплаш (қайтариш) бўйича ариза юборади. Ҳар бир аризани белгиланган муддатда, тегишли орган кўриб чиқади. Масалан, ҳисобга олинган жойи бўйича солиқ тўловчилар аризасини давлат солиқ бошқармаси (ДСБ) кўриб чиқади ва тасдиқлайди. 

Энг муҳими энди давлат солиқ инспекциялари ушбу вазифани бажармайди.

ДСБ ёки Йирик солиқ тўловчилар бўйича ҳудудлараро давлат солиқ инспекциясига ариза юборилган санадан масалани кўриб чиқиш жараёни бошланади.

Янги нормага кўра, ариза берилган кундан бошлаб икки хил усулда – 7 кундан кечиктирмай ва 60 кундан кечиктирмай кўриб чиқилади. 

Тезлаштирилган тартиб (7 кундан кечиктирмай) йирик солиқ тўловчилар, дипломатик ваколатхона вакиллари, маҳсулот тақсимотига оид битим иштирокчилари ва солиқ мониторинги иштирокчилари учун.

Умумий тартиб (60 кундан кечиктирмай) бошқа барча ҚҚС тўловчилари учун жорий этилади.

Қайд этиш керакки, август ойининг бошида Давлат солиқ хизмати органларига мингдан ортиқ ариза келиб тушган. Шундан 250 ариза қаноатлантириш учун Молия вазирлигига юборилди. Солиқ тўловчиларга 1 074,8 миллиард сўм миқдоридаги маблағлар қайтарилади.

Йил бошидан буён ҚҚСни қайтариш тарзида давлат тадбиркорлик субъектларига 3 триллион 46 миллиард сўм миқдоридаги маблағни қайтарди. 

Ҳисоботида номувофиқликлар аниқланган тадбиркорлик субъектлари хатоларини тузатиб, ҚҚС суммасини қайтариш учун қайта ариза юбориш ҳуқуқига эга.