Украина Президенти Владимир Зеленский кутилмаган ҳолатдан ҳайратини яшира олмаяпти. У Россия қурол-аслаҳаси учун ўзига иттифоқдош ва дўст санаган Европа давлатлари ва АҚШда ишлаб чиқарилган эҳтиёт қисмлар қўлланаётганига амин бўлди.

Энг ажабланарлиси, Россия– Украина зиддияти бошланганига тўрт йил тўлиши арафасида ҳамон Москва Ғарбда ишлаб чиқарилган ҳарбий қурол қисмларини оляпти. Бу ҳақда Зеленский ижтимоий тармоқ орқали маълум қилди. Шунингдек, гапининг исботи сифатида мисоллар ҳам келтирди.

– 5 октябрга ўтар кечаси Украинага қарши амалга оширилган кенг кўламли ҳужум вақтида Россия 549 зарба воситасидан фойдаланди, – дейди у. – Жами аслаҳа таркибида хориж компаниялари томонидан ишлаб чиқарилган 102 785 қисм мавжудлиги аниқланди.

Украина раҳбари маълум қилишича, ракета ва дрон учун конвертер, матрица, аналог-рақамли ўзгартиргич РФга АҚШ компаниялари томонидан етказиб берилмоқда. Ҳар бир “Шаҳид” дронида Хитой ва Тайвань ҳарбий саноатига тегишли камида 50 турдаги митти электроника унсури мавжуд. Россия ишлаб чиқараётган ўзи учар учоқларга Швейцарияда ишлаб чиқилган митти назорат қисмлари ўрнатилади. Парвозни бошқарувчи митти компьютерлар эса Буюк Британияда тайёрланади. Россия қанотли ракеталари учун қопловчи қурилмалар Япония, электр ўтказгич қисмлар Германияга мансуб. Шунингдек, РФ Нидерландия ҳамда Жанубий Кореяда ясалган мосламалардан ҳам фойдаланмоқда. Таъкидланишича, Украина Россияга ёрдам берган шахс ва компанияларга нисбатан санкция жорий этишга тайёргарлик кўрмоқда.

– Санкцияни айланиб ўтиш занжирини узиш жуда муҳим, чунки РФ бундай схемадан одамларни ҳалок қилиш учун фойдаланмоқда, – деган Зеленский. –Бунинг имкони бор.

Энг қизиғи,Украина етакчиси муаммони G7 аъзо-давлатлари билан бамаслаҳат, тизимли ҳал қилиниши, Россияга эҳтиёт қисм етказишда давом этаётган давлатларга нисбатан кескин санкция қўлланишини айтган. 

Ажабланарлиси, Киевга нисбатан зимдан иш қилаётган мамлакатлар орасида G7 таркибидаги Европа мамлакатлари ҳам бор-да? 

Зеленский айнан шу давлатлар билан бирга санкция тизимини ишлаб чиқмоқчи. Шунда айрим давлатлар ўзларига қарши санкция киритадими?

Тушунарсиз...

<iframe width="640" height="420" src="https://www.youtube.com/embed/mvm_ZIceiJc" title="Do‘st kim, dushman kim?.." frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Кенжа Бекжонов,

 Улуғбек Тўхтаев, ЎзА