O‘zbekiston Respublikasi Vazirlar Mahkamasi “Dori vositalarini davlat ro‘yxatidan o‘tkazish tartibi to‘g‘risidagi hamda Tibbiy jihozlarni davlat ro‘yxatidan o‘tkazish tartibi to‘g‘risidagi nizomlarni tasdiqlash haqida” qaror qabul qildi.

Unga muvofiq, dori vositalarini davlat ro‘yxatidan o‘tkazishga doir talablar va shartlar, zarur bo‘lgan hujjatlar va namunalar hamda davlat ro‘yxatidan o‘tkazish tartibini nazarda tutuvchi Dori vositalarini davlat ro‘yxatidan o‘tkazish tartibi to‘g‘risidagi hamda tibbiy jihozlarni davlat ro‘yxatidan o‘tkazishga doir talablar va shartlar, zarur bo‘lgan hujjatlar va namunalar hamda davlat ro‘yxatidan o‘tkazish tartibini nazarda tutuvchi Tibbiy jihozlarni davlat ro‘yxatidan o‘tkazish tartibi to‘g‘risidagi nizom tasdiqlandi. 

Sog‘liqni saqlash vazirligi:

a) bir oy muddatda: 

ushbu qarordan kelib chiqib, Sog‘liqni saqlash vazirligi huzuridagi “Farmatsevtika mahsulotlari xavfsizligi markazi” davlat muassasasining dori vositalari va tibbiy jihozlarni davlat ro‘yxatidan o‘tkazishga doir vazifa va funksiyalari bo‘yicha o‘z ichki idoraviy hujjatlari qayta ko‘rib chiqadi; 

dori vositalarining sifati, xavfsizligi va samaradorligini baholash jarayonida ishtirok etuvchi kadrlar tarkibini qayta ko‘rib chiqadi va Markazni malakali kadrlar bilan to‘ldirish, ularni davriy rotatsiya qilish, Markaz faoliyatiga doimiy asosda faoliyat yurituvchi tajribali xorijiy ekspertlarni jalb qilish choralarini ko‘radi; 

original dori vositalarining klinik sinovlari, jenerik dori vositalarining dori shaklidan kelib chiqqan holda, uning bioekvivalentligini o‘rganish va baholash tartibini “Inson uchun qo‘llaniladigan dori vositalariga qo‘yiladigan texnik talablarni uyg‘unlashtirish bo‘yicha xalqaro kengash (1SN)” talab va tavsiyalari asosida ishlab chiqib, tasdiqlaydi; 

b) uch oy muddatda: 

Markazning laboratoriyalarini modernizatsiya qilish, moddiy-texnik bazasini kengaytirish va quvvatini oshirish, Markaz va Sog‘liqni saqlash vazirligi huzuridagi Farmatsevtika tarmog‘ini rivojlantirish agentligining farmatsevtika faoliyatini tartibga solish sohasidagi vazifa va funksiyalarini muvofiqlashtiradi, “Zarur amaliyotlar (GxP)” talablariga muvofiqlik yuzasidan inspeksiyalar o‘tkazish tartibini xalqaro standartlar asosida tashkil etish yuzasidan takliflarni belgilangan tartibda Vazirlar Mahkamasiga kiritadi; 

xalqaro talablar asosida dori vositalari va tibbiy jihozlarni davlat ro‘yxatidan o‘tkazishga oid hujjatlariga qo‘yiladigan talablar bo‘yicha yo‘riqnomalarni hamda dori vositalari va tibbiy jihozlarni davlat ro‘yxatidan o‘tkazish uchun undiriladigan yig‘im miqdorlarini tasdiqlaydi; 

manfaatdor vazirlik va idoralar bilan birgalikda o‘zlari qabul qilgan normativ-huquqiy hujjatlarni ushbu qarorga muvofiqlashtiradi; 

v) 2026 yil yakuniga qadar Markaz huzuridagi laboratoriyalarning Jahon sog‘liqni saqlash tashkiloti tomonidan prekvalifikatsiyadan o‘tishini va Jahon sog‘liqni saqlash tashkilotining prekvalifikatsiyalangan laboratoriyalari ro‘yxatiga kiritilishini ta’minlaydi; 

g) davlat ro‘yxatidan o‘tkazishda ustuvorlik berilgan dori vositalari va tibbiy jihozlarning ro‘yxatini doimiy ravishda Markazning rasmiy veb-saytida e’lon qilib borilishini ta’minlaydi.

O‘zA