Ўзбекистон Республикаси Вазирлар Маҳкамаси “Фармацевтика маҳсулотлари бўйича давлат харидларини амалга ошириш механизмларини янада такомиллаштириш чора-тадбирлари тўғрисида” қарор қабул қилди.

Унга мувофиқ, мамлакатимизда фармацевтика маҳсулотлари бўйича давлат харидларини амалга оширишда шаффофлик ва рақобат тамойилларига риоя этган ҳолда, давлат буюртмачилари ҳамда аҳолини сифатли, хавфсизлиги ва самарадорлиги кафолатланган дори воситалари ва тиббий жиҳозлар билан таъминлаш мақсадида давлат хариди электрон тизими операторининг электрон тизимида “Farma.xarid.uz” модули яратилади. 

Давлат буюртмачилари томонидан дори воситалари ва тиббий жиҳозлар бўйича давлат харидларини мажбурий равишда Модуль орқали амалга ошириш тартиби жорий этилади. 

Модул дастлабки босқичда “Ўзбекистон республика товар-хомашё биржаси” АЖнинг электрон тизимида жорий этилади.  

2026 йил 1 июлдан бошлаб:

а) давлат рўйхатидан ўтказилиши лозим бўлган фармацевтика маҳсулотлари билан: 

дори воситалари бўйича “Зарур ишлаб чиқариш амалиёти (GMP)” сертификатига эга ишлаб чиқарувчилар; 

тиббий жиҳозлар бўйича “ISO: 13485” сертификатига эга ишлаб чиқарувчилар; 

“Зарур дистрибьюторлик амалиёти (GDP)” сертификатига эга дори воситаларини улгуржи реализация қилувчи ташкилотлар (дистрибьюторлар) дори воситалари ва тиббий жиҳозлар бўйича давлат харидларида иштирок этишига рухсат берилади, қонунчилик ҳужжатларида белгиланган ҳоллар бундан мустасно. Бунда фармацевтика маҳсулотлари гувоҳнома ва (ёки) сертификатларнинг амал қилиш муддати давомида ишлаб чиқарилган бўлиши талаб этилади; 

б) фармацевтика маҳсулотларининг давлат рўйхатидан ўтказилгани тўғрисидаги гувоҳномаси ва иштирокчиларнинг сертификатлари “Электрон ҳукумат” идоралараро интеграциялашув платформасидан олинган маълумотлар асосида Модуль орқали автоматик тарзда текширилади. 

2026 йил 1 мартдан бошлаб Андижон ва Наманган вилоятларида рўйхатдан ўтган давлат буюртмачилари, 2026 йил 1 июлдан бошлаб эса барча давлат буюртмачилари томонидан фармацевтика маҳсулотлари бўйича давлат харидлари Модуль орқали амалга оширилади. 

Уч ой муддатда Модулда фармацевтика маҳсулотларининг бошлангич нархини аниқлаш бўйича маркетинг тадқиқотларини ўтказиш имкониятлари яратилади. 

Маркетинг тадқиқотлари тўғри ўтказилиши тизимли мониторинг қилиб борилади. 

Қарор билан Фармацевтика маҳсулотлари бўйича давлат харидлари жараёнларини янада такомиллапггириш чора-тадбирлар режаси тасдиқланди. 

2026 йил 1 январдан бошлаб “Pharma.gov.uz” порталида: 

давлат харидлари соҳасида фойдаланиладиган товарларнинг (ишларнинг, хизматларнинг) миллий классификаторидан фойдаланиб ҳамда харидлар ҳажмларини кўрсатган ҳолда, барча фармацевтика маҳсулотларининг реестри; 

“Зарур ишлаб чиқариш амалиёти (GMP)” сертификатига эга дори воситаларини ишлаб чиқарувчилар, “Зарур дистрибьюторлик амалиёти (GDP)” сертификатига эга дистрибьюторлар ва “ISO: 13485” сертификатига эга тиббий жиҳозларни ишлаб чиқарувчиларининг реестри шакллантирилади ҳамда жамоатчилик учун эълон қилиб борилади.

ЎзА