Prezidentimizning 2022 yil 27 maydagi qaroriga muvofiq, muzeylar zimmasiga mahalliy va chet ellik sayyohlar uchun qo‘shimcha xizmatlarni joriy etish, Open Air Fest kabi madaniy-ma’rifiy, ko‘ngilochar tadbirlar va mahorat darslarini muntazam asosda o‘tkazish vazifasi yuklangan.

Shu munosabat bilan Amaliy san’at va  hunarmandchilik tarixi davlat muzeyida o‘zbek milliy bosh kiyimiga bag‘ishlab «DO‘PPI PARTY»  ko‘ngilochar  tadbiri bo‘lib o‘tdi.  

Ma’lumki,  do‘ppi  o‘zbek milliy libosining ajralmas qismi  hisoblanadi. Ushbu ajoyib bosh kiyimini tikish va bezatish O‘zbekiston  xalq  amaliy san’atining keng tarqalgan turidir. Ilgari bosh kiyimi  erkaklar va ayollar uchun bir xil ahamiyatga ega bo‘lgan, do‘ppi bezagi esa, uning sohibining jamiyatdagi ijtimoiy holatini bildirgan. Mazkur bosh kiyimi azaldan  fors va turk xalqlari  orasida  keng tarqalgan.  Turkiston xalqlari (ayniqsa  O‘zbekiston va Tojikiston  hududlarida) u  milliy libosning an’anaviy qismi bo‘lgan.  

O‘zbek do‘ppilari  boshqa xalqlarnikidan  o‘ziga xos shakli va bezagiga qarab  farqlanadi. Ular asosan  duxoba va shoyiga  atlas, zarhal iplar bilan tikiladi. Do‘ppi  uch qism: aylana yoki to‘rt burchak shaklidagi tepa qismi, kizak – gardish va jiyakdan iborat bo‘ladi.  

Respublikamizning turli viloyatlarida  ularning shakli va bezagi  turlicha bo‘ladi. Do‘ppini  asosan xotin-qizlar tikadi, biroq ba’zan  erkaklar ham bu  ish bilan shug‘ullanadi.  

Do‘ppilarning  tashqi  ko‘rinishi bir-biridan bezagi, badiiy  ramzlarining uyg‘unligiga qarab  farqlanadi.  Har bir viloyatning tabiiy  sharoiti, atrof-muhiti, aholi turmush tarzi,  an’analari va umumiy madaniyat rivoji ushbu hudud do‘ppisining  ko‘rinishiga  katta ta’sir qilgan. Masalan, Surxondaryo va Qashqadaryo (ayniqsa, Boysun)da dumaloq do‘ppilarni  yorqin  iplarda, Buxoroda esa, tilla rang iplar bilan tikishgan.  

Farg‘ona vodiysi  do‘ppilari eng qadimgi do‘ppilar hisoblanadi.  Chust, Marg‘ilon, Qo‘qon, Andijon do‘ppilari ularning yorqin namunalaridir.  

Mahorat darslari davomida marg‘ilonlik do‘ppido‘zlar ushbu hududda do‘ppi  tikish jarayonini namoyish etdi. Tadbirga tashrif buyurganlar  hunarmandchilikning  bu turi bilan yaqindan tanishish va  hatto,  o‘z qo‘llari bilan do‘ppi tikib ko‘rish  imkoniga ega bo‘ldi.

Tadbir doirasida maxsus musiqiy dastur va ushbu  an’anaviy bosh kiyimiga oid hujjatli film namoyish etildi.  

N.Usmonova tayyorladi, O‘zA.