Мамлакатимизда допингга қарши курашиш, ҳалол спорт тарғиботини кенг ёйиш, спортчилар, миллий терма жамоалар антидопинг қоидаларига риоя этишда зарур билимларга эга бўлиши борасида тизимли ишлар амалга ошириб келинмоқда.

Бу борада халқаро ҳамкорлик алоқаларининг тўғри йўлга қўйилгани допингга қарши курашишда ўзбекистонлик мутахассисларнинг етарли билимга эга бўлишини таъминламоқда.

Ўзбекистон Республикаси Миллий антидопинг агентлиги, Бош прокуратура ва Спорт вазирлиги мутахассисларидан иборат ишчи гуруҳ аъзолари Германия антидопинг агентлиги фаолияти билан яқиндан танишиш асносида допингга қарши курашишда миллий қонунчиликни ривожлантириш, допинг тарихи ва суриштируви ҳамда спортчиларда допинг тестларини амалга ошириш тизимини такомиллаштириш борасида келишувларга эришди.

Мазкур йўналишларда амалий ҳаракатларни халқаро ҳужжатлар асосида олиб бориш учун Германия антидопинг агентлиги директори Ларс Мортсифиер ва Кёлн Биохимия институти директори Марио Тхевис иштирокида ҳамкорлик меморандумини имзолаш лозимлиги таъкидланди.

Мулоқот чоғида антидопинг қонунчилигини такомиллаштириш, допинг қоидаларини бузганлик учун жавобгарлик чораларини кучайтириш, спортчининг биологик паспортларини бошқариш, допинг қоидалари бузилиши ҳолатларини аниқлаш тизимини йўлга қўйиш бўйича ўзбекистонлик мутахассислар учун Германияда амалий машғулотларни ташкил этиш масалалари таҳлил қилинди.

Шунингдек, ўзбекистонлик спортчиларнинг биологик паспортини яратишда қўшимча текширувларни Кёлн Биохимия институтида амалга ошириш, маълумотларни йиғиш ва таҳлил қилиш юзасидан келишувга эришилди.

Т.Рўзиев, ЎзА