Айни пайтда АҚШ президенти Дональд Трамп беш кунлик расмий ташриф билан Шотландияда бўлиб турибди. Сафар доирасида у Европа комиссияси раиси ва Буюк Британия бош вазири билан музокаралар олиб боришидан ташқари, ўзига тегишли гольф майдонларига боришни режалаштирган.

Қизиқ жиҳати, ташриф чоғида Трамп иммиграция ҳақида кескин баёнот берди. 

– Иммиграция Европани ҳалок қилади. Бу жараённи тўхтатиш керак. Агар ушбу масала  билан жиддий шуғулланмасангиз, Европадан асар ҳам қолмайди, -деди у ўз интервьюсида.

Шунингдек, у айрим раҳбарлар муаммога қарши кескин чора кўрмаётганини танқид қилди, аммо уларнинг номларини ошкор қилмаган.

АҚШ президенти ўз нутқида яна бир бор шамол энергетикасига қарши чиқди. Унинг таъкидлашича, шамол турбиналари Европанинг табиий гўзаллигини йўқ қилмоқда. 

– Сизлар гўзал водийларингизни вайрон қиляпсиз, қушларнинг ҳаётига зомин бўляпсиз. Европа шамол тегирмонларини тўхтатиши керак, – деди Қўшма Штатлар етакчиси.

Трамп бунгача ҳам шамол энергетикасига қарши танқидий муносабати билан танилган. Ҳатто у ўз оиласига тегишли бўлган Шотландиядаги гольф майдони яқинида шамол электр станцияси қурилишига қарши кураш олиб борган. Мазкур масала бўйича судда ютқазганидан сўнг, Трамп Шотландия ҳукуматининг суд харажатларини қоплашга мажбур бўлган эди.

Трамп яна ўша эски мавзуни кўтармоқда. Наҳотки, Шотландия ҳукумати унинг гапи билан беминнат электр энергияси ишлаб чиқараётган шамол тегирмонларидан воз кечса?

<iframe width="650" height="420" src="https://www.youtube.com/embed/nzp_cgAVcVE" title="Donald Tramp shamol energiyasiga qarshi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

К. Бекжонов, ЎзА