Жорий йилда Зомин туманида қишлоқ хўжалиги соҳасини ривожлантириш ва маҳаллий фермерларни қўллаб-қувватлашга катта эътибор қаратилмоқда. Ана шу йўналишда “Agro Finans Lizing” акциядорлик жамияти ташаббуси билан ташкил этилган “Долзарб 30 кун” тадбирлари доирасида боғдорчилик соҳасида амалий семинар ўтказилди.
Тадбирнинг асосий мақсади — боғдорчиликда агротехник ишларини ўз вақтида ва сифатли бажариш орқали ҳосилдорликни ошириш ҳамда маҳсулотни экспортга тайёрлашга кўмаклашишдан иборат. Бу эса нафақат фермер хўжаликларининг даромадини кўпайтириш, балки бутун туманнинг иқтисодий барқарорлигини мустаҳкамлашга хизмат қилади.
Семинарда Зомин тумани Ўсимликлар карантини ва ҳимояси инспекцияси мутахассислари фермерларга қишлоқ хўжалиги ишларини олиб боришдаги замонавий усуллар ва агротехник нормалар ҳақида атрофлича маълумот беришди. Айниқса, боғларда парвариш ишларини тўғри ташкил этиш, тупроқнинг унумдорлигини ошириш, дарахтларни озиқлантириш тизимини такомиллаштириш масалаларига кенг эътибор қаратилди.
Шунингдек, экспортга мўлжалланган мевали кўчатларни парваришлаш ва маҳаллий ўғитлардан самарали фойдаланиш бўйича илмий асосланган тавсиялар тақдим этилди. Бу эса ҳосилдорликни 20–30 фоизга оширишга имкон беради. Мисол учун, Ўзбекистон Қишлоқ хўжалиги вазирлиги маълумотларига кўра, агротехник чоралар тўлиқ бажарилганда боғдорчилик маҳсулотлари ҳосили сезиларли даражада кўпайган.
Фитосанитария ва зараркунандаларга қарши кураш бўйича ҳам амалий тавсиялар берилди. Бу жараёнда замонавий биологик ва кимёвий воситалардан фойдаланиш орқали боғларни касалликлардан ҳимоя қилишнинг самарали усуллари тушунтирилди.
Семинар сўнгида фермерлар ўзларини қизиқтирган саволларга жавоб олдилар ва соҳага оид муаммоларни бартараф этиш учун амалий йўл-йўриқлар берилди. Бу ҳамкорлик нафақат ишлаб чиқаришни ошириш, балки қишлоқ хўжалиги соҳасида янги инновацион усулларни жорий қилишга замин яратади.
Президент Шавкат Мирзиёев 2025 йил декабрь ойида Жиззах вилоятига қилган ташрифида ҳам қишлоқ хўжалигини ривожлантириш, хусусан боғдорчиликни модернизация қилиш бўйича бир қатор муҳим топшириқлар берган эди. Бу топшириқларни амалга ошириш учун маҳаллий ҳокимиятлар ва соҳадаги ташкилотлар ўз ишларини изчил олиб бормоқда.
Хулоса қилиб айтганда, Зомин туманида ўтказилган “Долзарб 30 кун” семинари фермерлар учун муҳим ва ўз вақтидаги тадбир бўлиб, у боғдорчиликни юқори технологиялар асосида ривожлантиришга, ҳосилдорликни ошириш ва маҳсулотнинг экспорт салоҳиятини кучайтиришга хизмат қилади. Бу жараёнлар аҳоли турмуш даражасини яхшилаш, иқтисодий барқарорликни таъминлашда муҳим аҳамият касб этади.
Абдужалол Қаюмов, ЎзА мухбири