Экин майдонларида етиштирилаётган полиз экинларига жиддий зарар етказиб, экспорт ҳажмининг камайишига сабаб бўлиши мумкин бўлган “Қовун пашшаси”, “Зарпечак” “Судралувчи какра” каби бегона ўтларга қарши оммавий курашни ташкиллаштириш ва бу ҳақида кенг жамоатчиликни хабардор қилиш мақсадида “Ўздавкарантин” инспекцияси “Долзарб 15 кунлик” эълон қилган эди.

28 июндан 16 июлгача давом этадиган муддатларда зарарли бегона ўтлар тарқалишининг олдини олиш учун боғдорчилик ва деҳқончилик хўжаликлари, шахсий томорқа, корхона, ташкилот, катта йўл бўйлари ва бошқа майдонларда Ўсимликлар карантини давлат инспекторлари назорат олиб боради.

Аслида ҳам мамлакатимизда ўсимликлар карантини тизимини янги босқичга кўтариш, соҳага илм-фан янгиликлари, халқаро амалиёт ва рақамли технологияларни кенг жорий этиш, қишлоқ хўжалиги маҳсулотлари экспорти ҳажми ва географиясини янада кенгайтириш чоралари кўрилмоқда. Айтиш жоизки, “Судралувчи какра” бегона ўти экинларнинг ҳосилдорлиги ва сифатини, паст текисликларнинг маҳсулдорлигини пасайтиради. “Судралувчи какра” уруғи билан ифлосланган дон қайта ишланганда, у аччиқ таъмли бўлиб қолади. Ўсимликнинг гуллаши ва мева ҳосил қилиши май, июнь ойларидан бошланиб, уруғи июль ойларида пишиб етилади. У тупроқдан сув ва ундан эриган минерал моддаларни кучли ўзлаштиради. Бундан ташқари, у ўзидан бошқа ўсимликларни ўсиши ва ривожланишини тўхтатиб (секинлаштириб) қўювчи модда ҳам ажратиб чиқаради. Шу сабабли карантин ости ўсимликларини йўл бўйлари, томорқалар, полизларда учратишингиз билан дарҳол ўз ҳудудингиздаги Ўсимликлар карантини давлат инспекторларига мурожаат қилишингиз сўралади.

Қайд этиш керакки, аҳоли хонадонлари, карантин объектларини инспекторлар текширмоқда. Хусусан, Тошкент шаҳар ўсимликлар карантини давлат инспекцияси “Долзарб 15 кунлик” доирасида пойтахтимиздаги яшил майдонлар, шоҳ кўчалар ва аҳоли яшаш жойларидаги арчазорларни карантин кўригидан ўтказди. Асосий эътибор, Зарпечак, бегона ўт, “Судралувчи какра” каби бегона ўтлар тарқалишининг олдини олишга қаратилмоқда.

– Бугунги кунда пойтахтимизда 35 минг гектардан кўпроқ майдон мавжуд бўлса, яшил майдонлар 7 минг гектарни ташкил этади, – дейди Тошкент шаҳар ўсимликлар карантини давлат инспекцияси инспектори Даврон Шодмонов. – Пойтахтимизда 220 турдаги дарахт ва 30 хилдаги бутани учратиш мумкин. Биз уларни мавсум давомида турли зараркунандалардан асраш, қуриганларини йўқ қилиш, янги экзотик ўсимлик турларини кўпайтириш ишларини олиб боряпмиз. “Долзарб 15 кунлик” доирасида ҳудудлардаги манзарали дарахтлар, гуллар ва бошқа ўсимликлар белгиланган тартибда зарарсизлантирилиб, далолатномалар расмийлаштирилмоқда. Бу каби тадбирлар маҳаллаларда ҳам давом эттирилиб, аҳоли яшаш жойларидаги мевали дарахтлар ҳам кўрикдан ўтказилиб, унда аниқланган зарарли организмларга қарши кураш чоралари кўрилди ва зарарсизлантириш ишлари олиб борилмоқда.

С.Шоева