Сўнги вақтларда мамлакатимизда «Док-1 Макс» дори воситасини ичиш оқибатида ўткир респиратор касалликларга чалинган болаларда ўлим ҳолати кузатилди.

Бу кенг жамоатчиликни жиддий хавотирга солди. Ҳиндистоннинг “Marion Biotech Pvt. Ltd” компаниясига тегишли мазкур дори воситаси республикамизга “Quramax Medical” МЧЖ томонидан импорт қилиниб, савдога чиқарилган. Шу йилнинг 30 декабридан бошлаб, ҳинд компанияси томонидан ишлаб чиқарилган ва Ўзбекистонда рўйхатдан ўтказилган барча турдаги дори воситалари савдоси вақтинча тўхтатилди.  

Хўш, «Док-1 Макс» дори воситасига сертификат берган идоралар аккредитациядан ўтказилганми? ЎзА мухбирининг бу саволига «Ўзбекистон аккредитация маркази» ДУК директори ўринбосари Зайниддин Аҳмедов қуйидагича жавоб берди:  

"Афсуски, "Док-1 Макс" дори воситасига сертификат берган идоралар юртимиздаги аккредитациядан ўтказилган лабораториялар бўлган. Ҳозирда мазкур лабораторияларнинг аккредитация фаолияти тўхтатилган. Бугунги кунда бу борада қўшимча ўрганишлар олиб борилмоқда. Ушбу дорида синов нотўғри ўтказилиши натижасида салбий оқибат юзага келдими ёки ишлаб чиқарувчининг хатоси билан юзага келганми? Бу ҳали ўрганилмоқда. Шунингдек, ҳуқуқни муҳофаза қилувчи органлар томонидан текширувлар олиб борилмоқда. Бунга жиноий иш ҳам очилган. Бу борада ҳали оммавий ахборот воситаларига қўшимча маълумот бериб борилади".  

Шаҳноза Маматуропова, ЎзА