ФИФА томонидан ташкил этилган “The Best” мукофотини топшириш маросими Қатар пойтахти Доҳа шаҳрида бўлиб ўтди. Маросимда 2025 йилнинг энг яхши футболчиси номи эълон қилинди.

Ушбу нуфузли мукофотга Франция терма жамоаси ҳамда «ПСЖ» клуби футболчиси Усмон Дембеле муносиб топилди. Дембеле бундан аввал France Football нашри томонидан тақдим этиладиган «Олтин тўп» мукофотини ҳам қўлга киритган эди

Маълумотларга кўра, ўтган мавсумда «ПСЖ» клуби Франция чемпионати, мамлакат кубоги ва Суперкубоги, шунингдек, Европа Чемпионлар лигаси ҳамда УЕФА Суперкубогида ғалаба қозонди. Клублар ўртасидаги жаҳон чемпионатида эса иккинчи ўринни эгаллади. Дембеле клуб сафида ўтказган 53 та ўйинда 35 та гол урди ва 14 та голли узатмани амалга оширди.

Йилнинг энг яхши футболчиси унвони учун курашда Усмон Дембеле Ашраф Ҳакими, Ҳарри Кейн, Килиан Мбаппе, Нуну Мендеш, Коул Палмер, Педри, Рафинья, Муҳаммад Салоҳ, Витиня ҳамда Ламин Ямал каби таниқли футболчиларни ортда қолдирди.

«Йилнинг энг яхши мураббийи» номинациясида «ПСЖ» клуби бош мураббийи, испаниялик мутахассис Луис Энрике ғолиб деб эълон қилинди.

Шунингдек, ФИФА талқинига кўра, йилнинг энг яхши дарвозабони сифатида Италия терма жамоаси ҳамда «ПСЖ»/«Манчестер Сити» клуби вакили Жанлуижи Доннарума эътироф этилди.

Дарвоқе, тарихда илк бор Чемпионлар лигасида ғалаба қозонган «ПСЖ»нинг 5 нафар футболчиси 2025 йил якунларига кўра ФИФА рамзий терма жамоасига киритилди.

“The Best” маросимида йил жамоаси таркибига қуйидаги футболчилар киритилди:

Жанлуижи Доннарума («ПСЖ»/«Манчестер Сити»), Ашраф Ҳакими, Виллиан Пачо (иккаласи — «ПСЖ»), Виржил ван Дейк («Ливерпул»), Нуну Мендеш («ПСЖ»), Коул Палмер («Челси»), Жуд Беллингем («Реал»), Витиня («ПСЖ»), Педри, Ламин Ямал (иккаласи — «Барселона»), Усмон Дембеле («ПСЖ»).

Жавоҳир Тошхўжаев,

ЎзА