Өзбекстан Дүниежүзілік банк тобының көмегімен Хорезм облысында жаңа күн электр станциясын іске қосады.

Хабарда айтылғандай, Дүниежүзілік банк Өзбекстан үшін банк кепілдігі түрінде 3,5 миллион доллар көлемінде қаржыландыруды мақұлдады. Бұл кепілдік «Өзбекстан ұлттық электр желілері» АҚ мемлекеттік компаниясының қуаты 100 МВт болатын жаңа күн электр станциясында өндірілетін электр энергиясын сатып алу бойынша төлем міндеттемелерін уақытында орындауын қамтамасыз етеді.

Хорезм облысындағы бұл нысанды салу және пайдалану Францияның Voltalia компаниясына жүктелген.
Күн электр станциясын 2025 жылдың қараша айында іске қосу жоспарланып отыр. Ол 177 гектар аумақта орналасып, жылына 240 гигаватт-сағаттан астам жаңартылатын энергия өндіреді. Оның жұмысы жылына 230 мың тоннадан астам көмірқышқыл газы шығарындыларын азайтуға және 60 мыңға жуық үй шаруашылығын таза энергиямен қамтамасыз етуге мүмкіндік береді деп күтілуде. Жоба елдің таза энергия өндірісін арттыру және «жасыл» экономикаға көшу жөніндегі күш-жігеріне елеулі үлес қосады.

«Дүниежүзілік банк тобы «Өзбекстан-2030» стратегиясына сәйкес Өзбекстанның энергия қажеттіліктерін қанағаттандыруда және 2030 жылға дейін жаңартылатын энергия көздерін 25 ГВт-қа дейін жеткізу үшін қолдау көрсетеді, бұл осы онжылдықтың соңына қарай елде тұтынылатын электр энергиясының үлесін 40 пайызға жеткізуге мүмкіндік береді», – деп атап өтті Дүниежүзілік банктің Орталық Азия бойынша өңірлік директоры Татьяна Проскурякова.

Айта кетейік, 2020 жылдан бастап Дүниежүзілік банк тобына кіретін Дүниежүзілік банк пен Халықаралық қаржы корпорациясы (IFC) Өзбекстан үкіметінің 1000 МВт күн және 500 МВт жел энергиясы қуаттарын құру жөніндегі әрекетін қолдап келеді.