Дүниежүзілік банктің жаңа есебіне сәйкес, Өзбекстан экономикасы 2025 жылы 6,2 пайызға өсуі күтілуде. Бұл көрсеткіш маусым айындағы бұрынғы 5,9 пайыздық болжамнан жоғары.
Дерекке сәйкес, өсім болжамының жақсаруы елге келіп түсетін ақша аударымдарының көбеюі, мемлекеттік және жеке инвестициялар белсенділігінің артуы, сондай-ақ экономикадағы тұрақтылықпен байланысты.
Еуропа және Орталық Азия аймағында (ЕОА) 2025 жылы экономикалық өсім 2,4 пайызды құрауы мүмкін. Дегенмен, Орталық Азия елдері аймақтағы жетекші экономикалар қатарынан көрінуде — субаймақтағы өсім 5,9 пайызға жетуі ықтимал.
Бұл өсімге Қазақстанда мұнай өндіру көлемінің артуы, Қырғызстан, Тәжікстан және Өзбекстанға ақша аударымдары мен инвестициялардың өсуі ықпал етуде.
Дүниежүзілік банк деректеріне қарағанда, 2025 жылдың алғашқы жартысында Өзбекстанға ақша аударымдары көлемі өткен жылға қарағанда 27 пайызға өсіп, 8,2 миллиард АҚШ долларына жеткен.
Болжам бойынша, Өзбекстан 2025 және 2026 жылдары ЕОА аймағындағы ең жылдам дамушы бес экономиканың қатарында қала береді. 2025 жылы ЖІӨ өсімі — 6,2 пайыз, ал 2026 жылы — 6 пайыз болады деп күтілуде.
Қырғызстан (9,2%), Тәжікстан (7,6%), Грузия (7%) және Қазақстанмен (5,5%) бірге Өзбекстан аймақтағы экономикалық белсенділігі жоғары елдер қатарынан орын алмақ.
Дүниежүзілік банктің есебінде Өзбекстан экономикасында жаңа жұмыс орындарын ашу мен өсімді қамтамасыз етуде басым салалар ретінде химия өнеркәсібі, ақпараттық-коммуникациялық технологиялар (АКТ), сондай-ақ жеміс-жидек және көкөніс шаруашылығы көрсетілген.
Атап айтқанда, химия өнеркәсібінде бәсекеге қабілеттілікті арттыру, субсидиялар мен баға шектеулерін кезең-кезеңімен жою, АКТ саласында кеңжолақты интернет қамту аясын кеңейту, ал ауыл шаруашылығында заманауи суару жүйелеріне инвестиция салу қажеттігі атап өтілген.
Дүниежүзілік банк Еуропа мен Орталық Азия елдерінде жалпы өсім қарқыны баяулағанымен, өңірде тұрақтылық үрдісі сақталып отырғанын жеткізді. Өзбекстанда жүзеге асырылып жатқан экономикалық реформалар, инфрақұрылымдық жобалар мен жеке секторды қолдау шаралары елді аймақтағы экономикалық өсім көшбасшыларының қатарында ұстап тұрады деп күтілуде.