«Diydor» yoshlar eksperimental teatr-studiyasi 2023-2024 yil uchun o‘z ijodiy mavsumini yakunlaganini e’lon qildi.
Mavsum yakuni mazkur ijodiy jamoaning “Masxarabozlar ishi” hamda “Avtohalokat” spektakli namoyishi bilan yakunlandi.
Aytish kerakki, ushbu ijodiy mavsum teatr jamoasiga juda omadli keldi. Jamoa 2023 yil sentyabrida Hamza Hakimzoda Niyoziyning “Maysaraning ishi” asari asosida Ruslan Haydarov tomonidan sahnalashtirilgan “Masxarabozlar ishi” spektakli premerasi bilan yangi mavsumni boshlagan edi.
O‘tgan yilning 27-29 sentyabr kunlarida "Diydor" jamoasi Qozog‘iston Respublikasi Turkiston shahrida bo‘lib o‘tgan “Ko‘cha teatrlari xalqaro festivali”da “Masxarabozlar ishi” spektakli bilan qatnashib, faxrli 1-o‘rinni egalladi.
O‘tgan yili san’atga qiziqishi bo‘lgan yosh abituriyentlardan va Butunrossiya davlat kinematografiya instituti Toshkent filialining 10 nafar talabalari ushbu ijodiy jamoaga imtihon asosida qabul qilindi.
Shuningdek, bolajonlar uchun Yangi yil tuhfasi sifatida Husanboy Mamasharipov tomonidan sahnalashtirilgan “Wednesday” spektakli namoyish etildi. Ayni paytda poytaxtimizdagi “Furqat bog‘i”da bolajonlar uchun “Yangi yil tomoshalari” teatrlashtirilgan dasturi namoyish etildi.
Shveysariyalik dramaturg Fridrix Dyurrematt qalamiga mansub hamda kinorejissyor Jahongir Qosimov tomonidan sahnalashtirilgan “Avtohalokat” spektakli premerasi bo‘lib o‘tdi hamda ushbu spektakl xalqimiz tomonidan iliq kutib olindi.
Ayni paytda rejissyor Ruslan Haydarov tomonidan sahnalashtirilgan "Masxarabozlar ishi” spektakli 2024 yil 3-9 iyun kunlari Qozog‘iston Respublikasi Almati shahrida bo‘lib o‘tgan “V Yoshlar teatr forumi"da ishtirok etib, faxrli uchinchi o‘rinni egalladi.
O‘zbekiston Respublikasi Prezidentining 2023 yil 15 dekabrdagi “Aholiga madaniy xizmat ko‘rsatish darajasini yanada oshirish chora-tadbirlari to‘g‘risida”gi qaroriga asosan, ushbu teatr jamoasi Navoiy viloyati Qo‘g‘irchoq teatrida hamda viloyatdagi harbiy okrugda, Buxoro musiqali teatri va Buxoro harbiy okrugida “Masxarabozlar ishi” spektaklini namoyish etib, tomoshabinlar olqishiga sazovor bo‘ldi.
Bularning bari muxlislarga sara sahna asarlarini taqdim etish borasidagi amaliy ishlarning yorqin namunasidir.
N.Usmonova,
O‘zA