Фуқаролик ишлари бўйича Беруний туманлараро судининг жорий йил 22 октябрдаги ижро ҳужжатида Қорақалпоғистон Республикасининг Элликқалъа туманидаги 17-сонли давлат мактабгача таълим ташкилоти директори ўринбосари лавозимидан асоссиз равишда бўшатилган К.А.ни аввалги лавозимига ишга тиклаш белгиланган.

Шунга қарамасдан, жавобгар Элликқалъа туманидаги 17-сонли давлат мактабгача таълим ташкилоти томонидан ушбу суд қарори ижроси таъминланмаган. Шу сабабли даъвогар Мажбурий ижро бюроси Элликқалъа тумани бўлимига суд қарори ижросини таъминлаб беришни сўраб, мурожаат қилишга мажбур бўлган. 

Бюронинг Элликқалъа тумани бўлими томонидан ижро ҳаракатига киришилиб, жавобгар ташкилот раҳбарига суд қарори ижросини таъминламаслик қонунда белгиланган жавобгарликка асос бўлиши ҳақида огоҳлантириш берилди. Шунинг натижасида даъвогар К.А. ўзининг аввалги иш ўрнига қайта тикланди.

Довуд Абибуллаев, ЎзА