Инсон учун энг буюк неъмат бу Ватан туйғусидир. Биз умримиз давомида нимагаки эришсак, уни ватандан айро тасаввур эта олмаймиз. Мунис онамиз каби бағрига босиб, бизга ризқ тутаётган шу муқаддас масканнинг истиқболи учун меҳнат қилиш энг гўзал амалдир.

Ўзбекистон улкан имкониятлар мамлакатидан, шарофатлар, шафоатлар масканига айланиб бормоқда. Бу халқимизнинг энг ширин ниятларининг ижобати, меҳнатсеварлиги, иймон бутлигининг хосиятидир.

Кеча давлатимиз раҳбарининг мамлакатимиз мустақиллигининг йигирма тўққиз йиллиги муносабати билан бўлиб ўтган тантанали байрам тадбиридаги нутқларини бевосита қашқадарёликлар сафида туриб тинглар эканман, юрагимда гуллаган Ватан ишқи қайта чирой очди.

Фидоийликнинг чин намунасини, жонкуярликнинг асл тимсолини кўрдим. Юртбошимиз табрик нутқида ҳеч бир соҳани четда қолдирмаганликлари, иқтисодиёт, қишлоқ хўжалиги, таълим-тарбия, маънавият, оила, ёшлар масаласи бирдек қамраб олингани, таҳлиллар асосида ютуқлар эътироф этилгани юракни катта қилди. Ҳа, ҳақиқатдан ҳам биз қудратли халқнинг фарзандларимиз. Бу айни мана шу синовли кунларда яна бир бор кўринмоқда. Ҳар бир ишни кенгашиб, сабр, матонат ҳамда фозиллик билан тадбир қилган элимиз бугунги кунларни янада жипслашиб, бир тан, бир жон бўлиб енгиб ўтмоқда.

Президентимиз бир жумлани бот-бот таъкидладилар, яъни «адолат» ва «ҳақиқат». Қачон бу иккаласи ёнма-ён туради? Қачонки, одамларимиз ҳаётдан рози бўлса, ўтаётган кунларидан мамнун бўлса.

Янги Ўзбекистонга, янгича фикрлайдиган юрагида ишонч ва юртга муҳаббат ҳисси муқим яшайдиган ўтюраклар керак. Кўзлардаги ғурур бизни албатта кўзланган марраларга олиб боради. Бунга яна бир иймон келтирдим. Йўлбошчининг қатъият билан айтганларини тинглай туриб... Билдимки, худди шу он ҳар бир қалбда бир нақш муҳрланди - мен ҳам битта Ўзбекистонман!

Биласизми, бугун мен мустақилликни кўрдим. У айни фикрлари тўлган, қарашлари ўктам, мақсадлари аниқ бўлган 30 ёш остонасида. Уни бағрига босиб, пешонасида ўпаётган онахон бир шукрона туяди. Етказганига шукур. Омон-омон кунларингга кўз тегмасин, халқим. Уйғоқ юрак, катта жасорат ва адл аҳд билан йўлга отланган элимнинг йўллари ойдин, мақсадлари эзгу...

Янги уйғоқлик даври муборак! Нияти улуғлар, ниятига етурлар. Изҳорларимга шеър қўйилар, аста...

Қалбим юксак эркнинг майдони бўлса...
Ватан! Айланайин қароқларингдан,
Азизларга болиш тупроқларингдан ,
Гуллари ярашган пештоқларингдан ,
Байрамларинг боқий бўлсин, жон элим ,
Айёминг муборак, она ўзбегим!

Ўғлим орзулари осмонлардан кенг,
Ойқизим нияти ойдин ойга тенг,
Қалбим юксак эркнинг майдони бўлса,
Унга байроғингни виқор-ла илгин.
Ҳар рамзинг кўксимда ин қурсин элим,
Айёминг муборак, она ўзбегим!

Бир шукуҳ, бир номус суғорди дилни ,
Кўрдим покиза ва буюк бир тилни ,
Навоий, Бобуру, Мирзо Бедилни
Қалб очиб сен томон келиши асли,
Қайта туғилтирмиш ўзбекли дилни.
Аслиятни тумор билган жон элим ,
Айёминг муборак, она ўзбегим!

Ҳув , ана бир ғурур келади кулиб,
Пешонага ҳурлик пешбандин илиб ,
Боболар йўлидан мардона бориб ,
Эл бўлган улусим келса керилиб ,
У дардли кунларинг ювилсин элим ,
Байраминг муборак, она ўзбегим!

Синовли кунларда, синашта бўлган,
Бир терлаб, тик қараб қаддини керган.
Фозил одамларнинг фикрини ўқиб,
Сабрнинг бошига дўппи кийдирган.
Дили равшан-йўли равшаним элим,
Байраминг муборак, она ўзбегим!

Сенга айтаримни дастурхон қилсам,
Дўстлар келгайдирлар, бўлиб жамулжам.
Қайта туғилсаму, уйғонсам, кулсам
Тонглар доя бўлсин, қуёш ёпинчиқ ,
Ўзбекистон дея чанқовуз чалсам,
Бари ярашгайдур, султоним элим ,
Байраминг муборак, она ўзбегим!