Мутахассисларнинг таъкидлашича, футболдаги ғалабалар унинг оммавийлигига боғлиқ экан. Мана беш йилдирки, “Давлат хавфсизлик хизмати” кубоги учун футбол бўйича 16-30 ёшлилар ўртасида мусобақалар ўтказиб келинади. Бу йил Фарғона вилоятидаги 1015 та маҳалла футбол жамоалари ўзаро куч синашди. Ниҳоят ғолиб ва совриндорлар, энг яхши футболчилар аниқланди. Уларни тақдирлаш эса чин маънода ёшлар байрамига айланиб кетди.

Тошлоқлик Моҳира Жўрабоева қизлар ўртасидаги, қувасойлик Жамшид Убайдуллаев мини футболчилар ўртасида, Учкўприк ва Фарғона шаҳри жамоаси аъзолари Отабек Аҳмаджонов ҳамда Шаҳзод Усмоновлар турнирнинг “энг яхши футболчиси” деб эълон қилинди ва улар махсус совғалар билан тақдирланди.

Ниҳоят қизлар, йигитлар ўртасидаги футбол ва минифутбол мусобақаси ғолиблари саҳна марказига таклиф этилди. Фарғона, Бағдод, Тошлоқ, Учкўприк туманлари, Қўқон, Фарғона, Қувасой шаҳар жамоалари совринли ўринларни эгаллади.

Ғолибларга эса Давлат хавфсизлик хизмати Фарғона вилояти бошқармасининг бош соврини – кубок ҳамда тегишли диплом, совғалар топширилди. Улар хотин-қизлар жамоалари ўртасидаги мусобақа ғолиби – Фарғона тумани, минифутболчи Қувасой шаҳар “Боғбон” МФЙ жамоаси ва футбол бўйича Фарғона шаҳар “Янги йўл” МФЙ ёшлари эди. Уларнинг барчаси медаллар, спорт анжомлари билан тақдирланди.  

ДХХ кубоги ғолибларини тақдирлаш маросими санъат усталарининг галаконцерти ва ёшлар сайли билан давом этди.

<iframe width="560" height="315" src="https://www.youtube.com/embed/ingUkQTewaM?si=r0LY-fJtFVmQSoNV" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Муҳаммаджон Обидов,

Элёр Олимов (видео) ЎзА