Аввал хабар берганимиздек, 16 - 17 сентябрь кунлари Бельгиянинг Хасселт шаҳрида Дэвис кубогининг биринчи жаҳон гуруҳида Ўзбекистон теннисчилари Бельгия терма жамоасига қарши кортга чиқади.
Хасселт шаҳридаги "Sporthalg Alverberg" аренасида ўтказилган қуръа ташлаш маросими якунларига кўра, терма жамоа спортчилари ўз рақибларини билиб олди. Биринчи кунги баҳсларда, одатдагидек, яккалик учрашувлар ўтказилади.
Ўйинларда Бельгия терма жамоасининг биринчи ракеткаси, ATP рейтингида 100 - ўринни эгаллаб турган Дэвид Гоффиннинг иштирок этмаётгани жамоалар ўртасидаги мувозанатни бир оз тенглаштиргандек. Аммо, барчасига кортда ҳаракатланадиган ракетка усталарининг маҳорати ойдинлик киритишини назарда тутсак, натижа сўзсиз омадга ҳам боғлиқ бўлиб қолади.
Қуйида кортда чиқадиган теннисчилар билан танишинг:
Киммер Коппеанс - Ҳумоюн Султонов;
Йорис де Лур - Сергей Фомин;
Сандер Жилле/Йоран Влиеген - Сергей Фомин/Максим Шин;
Йорис де Лур - Ҳумоюн Султонов;
Киммер Коппеанс - Сергей Фомин.
Айтиш лозим, Бельгия - Ўзбекистон терма жамоалари шу кунгача ўзаро тўқнаш келмаган. Шиддатли ўйинларда ҳамюртларимизга омад тилаймиз.
Т. Рўзиев, ЎзА