Florida gubernatori Ron Desantis 2024 yilda Prezident saylovida nomzod ko‘rsatishi haqida e’lon qilgandan keyin, birinchi kundayoq 8,2 million dollar to‘pladi, deb yozmoqda New York Times gazetasi nomzodning saylovoldi shtabi bergan ma’lumotga tayanib.

Gazetaning yozishicha, Desantis o‘zining saylovoldi kampaniyasini boshlaganini Twitter orqali e’lon qilayotgan paytda yuz bergan texnik uzilish ham donorlar ishtiyoqiga ta’sir etmagan. Nomzodning saylovoldi shtabi kampaniya e’lon qilingandan keyin birinchi soatdayoq uning hisobiga 1 million dollar kelib tushganini ma’lum qiladi.

Maqolada keltirilishicha, ushbu xayriya Desantisning saylovoldi kampaniyasi doirasida amalga oshiradigan safarlarini moliyaviy tomondan to‘liq ta’minlay oladi. Gubernator kelasi haftada uchta shtatning 12 ta shahrida bo‘lishni rejalashtirgan.

AQSHning amaldagi Prezidenti Jo Bayden 2019 yil nomzodini e’lon qilganda dastlabki 24 soatda faqat 6,3 million dollar to‘play olgandi, deya ta’kidlaydi mazkur nashr.