Флорида губернатори Рон Десантис 2024 йилда Президент сайловида номзод кўрсатиши ҳақида эълон қилгандан кейин, биринчи кундаёқ 8,2 миллион доллар тўплади, деб ёзмоқда New York Times газетаси номзоднинг сайловолди штаби берган маълумотга таяниб.

Газетанинг ёзишича, Десантис ўзининг сайловолди кампаниясини бошлаганини Twitter орқали эълон қилаётган пайтда юз берган техник узилиш ҳам донорлар иштиёқига таъсир этмаган. Номзоднинг сайловолди штаби кампания эълон қилингандан кейин биринчи соатдаёқ унинг ҳисобига 1 миллион доллар келиб тушганини маълум қилади.

Мақолада келтирилишича, ушбу хайрия Десантиснинг сайловолди кампанияси доирасида амалга оширадиган сафарларини молиявий томондан тўлиқ таъминлай олади. Губернатор келаси ҳафтада учта штатнинг 12 та шаҳрида бўлишни режалаштирган.

АҚШнинг амалдаги Президенти Жо Байден 2019 йил номзодини эълон қилганда дастлабки 24 соатда фақат 6,3 миллион доллар тўплай олганди, дея таъкидлайди мазкур нашр.